Qar apiti bu yil Uyghur éli déhqanchiliqigha 4 milyard 745milyon yüen ziyan saldi


2008-03-18
Share

Uyghur aptonom rayonluq déhqanchiliq hemde ormanchiliq nazaretlirining bu yilqi qar apitining ziyanliri heqqidiki doklatliridin ashkarilinishiche, bu yil qish pesli kirishi bilen Uyghur élining jenubini asas qilip dawam qilghan soghaq hawa we qar apetliri, Uyghur élining yette oblast hemde wilayettiki 40 tin artuq nahiyiside texminen besh milyon déhqan ‏ - charwichini apetke uchratqan bolup, déhqanchiliq, charwichiliq hemde baghwenchilikte kélip chiqqan biwaste iqtisadi ziyan 4 milyard 745 milyon yüen'ge yetken.

Shinxu'a agéntliqining bu heqte tarqatqan xewiride qeyt qilinishiche, bu yil jenubiy Uyghur élini asas qilip yüz bergen qar hemde üshshük apiti, 50 yildin buyanqi eng éghir apet hésablinidiken. Hazirghiche melum bolushiche, Uyghur élining yerlik méwilik baghlirining %54 i üshshükte qalghan bolup, baghwenchiliktinla üch milyard yüendin artuq iqtisadiy ziyan körülgen. Bu qar we üshshük apiti seweblik bu yil déhqanchiliqta körülgen omumiy ziyanning %60 tin köprekini teshkil qilidiken. Bu déhqanchiliq hemde charwichiliqta körülgen ziyanning 15hessisige toghra kélidu.

Üshshük apiti seweblik bu yil Uyghur élining méwe mehsulati alahide töwen bolidiken. Bolupmu badam mehsulati %75 töwenlishi mumkin, bashqa méwe mehsulatlirimu %20 etrapida töwen bolidiken. Radi'omizning igilishige qarighanda, qar hem üshshük apetlirining bunche zor ziyanlar élip kélishige,Uyghur éli hökümet da'irilirining apettin aldin xewerlendürüsh hemde qutquzush ishlirini waqtida élip barmighanliqimu asasliq sewebning biri bolghan.

Gerche, nöwette üshshük apiti ötüp ketken bolsimu,Uyghur éli métrologiye hemde muhit mutexessisliri bu yil etiyaz we yaz peslide köp jaylarda éghir kelkün apetlirining yüz bérish éhtimalliqini agahlandurmaqta. (Gülchéhre)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet