Xitay hökümiti Uyghur élige qaratqan siyasiy bésimini kücheytmekte

Uyghur élide bölgünchilikke qarshi turush , muqimliqini kücheytish we " üch xil küch" shuningdek her xil düshmen küchlerge zerbe bérish herikitini ching tutushta partiye ezalirining rolining intayin muhim ikenliki alahide tekitlenmekte.

Xitay hökümitining Uyghur élige teyinligen hoquqdari wang léchüen " muhim halqini tutup, muqimliqni qoghdash xizmitini pütün küch bilen yaxshi ishlesh kérek" dep otturigha qoyup bir kündin kéyin , aptonom rayonluq partkom , partiye ezalirining muqimliqni jari qildurushtiki rolining muhimliqi, buning üchün Uyghur ilidiki partiye ezaliri we kadirlarning siyasiy ölchemni tewrenmey kücheytishi, milliy bölgünchilikke qarshi turush, milletler ittipaqliqini qoghdash, wetenning birlikini qoghdash, döletning aliy menpe'eti we her millet xelqining tüp menpe'etige munasiwetlik mesililerde siyasiy jehette küchlük, meydani mustehkem, bayriqi roshen bolushi kéreklikini alahide tekitlidi.

Chet'ellerde pa'aliyet élip bériwatqan Uyghur siyasetchiliri xitay hökümitining Uyghur élide muqimliqni kücheytishni, partiye ezalirining muqimliqni jari qildurushtiki rolining muhimliqini tekitlishi hemde partiye ezalirining bölgünchilikke qarshi turush, milletler ittipaqliqini qoghdash, döletning birlikini qoghdash qatarliq mesililerde "meydani mustehkem, bayriqi roshen bolush" ni alahide telep qilishi Uyghur siyasiy pa'aliyetchilirining chet'ellerdiki pa'aliyetliridin endishe qiliwatqanliqining roshen ipadisi dep qarimaqta .

Siyasiy közetküchilerning bildürüshiche, Uyghur milliy herikitining yétekchisi rabiye qadir xanimning amérika we yawrupa elliride himayige érishishi, bolupmu yéqinda amérika dölet mejlisining qarar layihisige, xitay hökümitining Uyghurlarning kishilik hoquqini eslige keltürüshi toghrisidiki bir qanche maddining kirgüzülüshi xitay da'irilirining Uyghur élige qaratqan kontrolluqini yenimu kücheytishige seweb bolmaqta iken. (Eqide)