Xitay hökümiti Uyghurlarning ayropilanda seper qilishigha cheklime qoyghan

Franisye agéntliqining 31‏ - iyul küni ürümchidin xewer qilishiche, béyjing hökümiti Uyghurlarning xitay ichide ayropilan bilen seper qilishini cheklimekte iken.
Muxbirimiz eqide xewiri
2008-07-31
Share

 Xewerde éytilishiche, Uyghurlarning ayropilanda xitay ölkilirige bérishi nahayiti qiyinlashqan bolup, Uyghurlar Uyghur élidin xitayning her qandaq bir shehirige ayropilan bilen bérish üchün nurghunlighan resmiyetlerni ötüshi kérek iken. Hawa yoli shirketliri, xitay ölkiliridin alahide teklipnamisi bolmighan Uyghurlargha ayropilan béliti satmaydiken.

Fransiye agéntliqining heshmet isimlik bir Uyghur tijaretchining sözlirini neqil keltürüshiche, u soda meqsitide xitayning shi'en shehirige bérishqa ayropilan béliti élish üchün nurghun tosalghulardin ötken bolup, shi'endiki shirkettin birnechche teklipname élip kelgendin kéyin andin hawa yoli shirkiti uninggha bélet sétishni qobul qilghan.

Bu heriketni Uyghurlargha qaritilghan bir adaletsizlik dep körsetken heshmet, özining béyjing olimpik tenheriket yighinini qollaydighanliqini lékin Uyghurlar ayropilan istansilirida duch kéliwatqan tekshürüshlerning Uyghurlar üchün éghir bir azap ikenlikini tekitligen. 

Xewerde, xitay hökümitining Uyghur musteqilchilirini béyjing olimpik tenheriket yighinigha qarshi térrorluq hujumliri élip bérishni pilanlawatidu dep eyiblewatqanliqi, emma xelq'ara kishilik hoquq teshkilatlirining xitay hökümitini olimpik bixeterliki mesilisidin paydilinip, Uyghurlarning milliy herikitini basturmaqta dep tenqid qiliwatqanliqi alahide eskertilgen.


Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet