Wang léchüen, kompartiye ezaliridin "üch xil küch" ke dawamliq zerbe bérishni telep qildi

Xitay hökümitining Uyghur aptonum rayonigha teyinligen partkom sékritari wang léchüen düshenbe küni Uyghur élidiki kompartiye ezaliri we jama'et xewpsizlik xadimlirini dawamliq türde "üch xil küchler" ge qattiq zerbe bérishke dewet qildi.

Wang léchüen sözide, "biz choqum muqimliq hemmini bésip chüshidu, dégen idiyidin tewrenmey, bölgünchi, térrorchi we diniy radikaldin ibaret üch xil küchlerge qet'iy boshashmastin zerbe bérishimiz kérek" dégen.

U bu sözni, "milliy bölgünchilik" ke qarshi turush xizmitini doklat qilish xizmet guruppisidiki kompartiye ezaliri bilen körüshkende qilghan. Ötken yilidin bashlap, xitay hökümiti Uyghur élidiki " üch xil küchler" ge qarshi turushta xizmet körsetken dep qarighan kompartiye ezaliridin guruppa teshkillep, xitayning chong sheherliride Uyghur élidiki "üch xil küchler" ge zerbe bérish herikiti heqqide doklat bergen idi.

Buning aldidila, xitay kompartiyisining bixeterlik ishlirigha mes'ul emeldari lo gen tibet we Uyghur élidiki milliy bölgünchi küchlerge qattiq zerbe bérishni tekitligen.

Xitay hökümiti "üch xil küchler" ge zerbe bérishni tekitlewatqan bir peytte, amérika tashqi ishlar ministirliqi düshenbe küni kishilik hoquq doklatini élan qilip, xitay hökümitining xelq'ara térrorchiliqqa qarshi urushtin paydilinip, tinchliq bilen siyasiy we diniy köz- qarashlirini otturigha qoyghan Uyghurni basturiwatqanliqini eyiplidi. (Arzu)