Ваң лечүән, муқимсизлиқ уйғур елидә йәнила җиддий мәсилә, деди


2007-10-15
Share

Уйғур аптоном райони парткоминиң секритари ваң лечүән, дүшәнбә күни бейҗиңда мухбирларға баянат берип, уйғур или вәзийитиниң йеқинқи йиллардин бери көп яхшиланғанлиқиға қаримай, етник муқимсизлиқниң районда йәнила җиддий мәсилә һесаблинидиғанлиқини билдүрди.

Ваң лечүән," чәтәл күчлири "ниң райондики мәсилиләрни кочилаватқанлиқини тәкитлигән болсиму, лекин у бу "чәтәл күчлири"ниң кимләрни көрситидиғанлиқини тилға алмиди. Ваң, бу сөзләрни бейҗиңда ечиливатқан компартийә қурултийиниң йиғин арисида тәкитлигән болуп, у" шинҗаң наһайити мурәккәп җай, болупму әтраптики вәзийәт наһайити мурәккәп " дегән. У йәнә, "чәтәлдә хәлқни ички җәһәттин күшкүртиватқан күчләр бар. Нөвәттики вәзийәттә бизниң бихәтәрлик тәшкилатлиримиз вә сақчилар җиддий һаләттә туруватиду. Әгәр һәр қандақ киши бузғунчилиқ қилмақчи яки дөләтни парчилимақчи болидикән, биз шүбһисизки уларни бастуримиз " диди. Уйғур аптоном райони парткоминиң муавин секритари нур бәкри, һөкүмәтниң миллий мәсилиләрдә мушәққәтлик күрәшләргә дуч кәлгәнликини илгири сүргән. У, "районниң иҗтимаий муқимлиқини қоғдаш вә иқтисадни раваҗландуруш биринчи вәзипимиз " дәп тәкитлигән.

Гәрчә ваң лечүән етник муқимсизлиқ йәнила райондики җиддий мәсилә, дәп тәкитлигән болсиму, лекин буниңдин бурун аптоном районниң рәиси исмаил тиливалди бу мәсилидә ваң лечүән билән зит пикирләрни баян қилип кәлди. У, буниңдин бурун елан қилған бир баянатида , уйғур или вәзийитиниң наһайити муқим икәнликни вә йеқинқи бир қанчә йилдин бери һечқандақ террорлуқ вәқәлири йүз бәрмигәнликини илгири сүргән.

Хәлқара кишилик һоқуқ тәшкилатлири хитай даирилириниң уйғур елидә йолға қоюватқан сияситини тәнқидлимәктә. Уларниң әскәртишичә, хитай америкиниң террорчилиққа қарши туруш урушидин пайдилинип, уйғурларни бастуруш сияситини қанунлаштурмақчи болуватиду. (Әркин)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт