Wang léchüen, muqimsizliq Uyghur élide yenila jiddiy mesile, dédi

Uyghur aptonom rayoni partkomining sékritari wang léchüen, düshenbe küni béyjingda muxbirlargha bayanat bérip, Uyghur ili weziyitining yéqinqi yillardin béri köp yaxshilan'ghanliqigha qarimay, étnik muqimsizliqning rayonda yenila jiddiy mesile hésablinidighanliqini bildürdi.

Wang léchüen," chet'el küchliri "ning rayondiki mesililerni kochilawatqanliqini tekitligen bolsimu, lékin u bu "chet'el küchliri"ning kimlerni körsitidighanliqini tilgha almidi. Wang, bu sözlerni béyjingda échiliwatqan kompartiye qurultiyining yighin arisida tekitligen bolup, u" shinjang nahayiti murekkep jay, bolupmu etraptiki weziyet nahayiti murekkep " dégen. U yene, "chet'elde xelqni ichki jehettin küshkürtiwatqan küchler bar. Nöwettiki weziyette bizning bixeterlik teshkilatlirimiz we saqchilar jiddiy halette turuwatidu. Eger her qandaq kishi buzghunchiliq qilmaqchi yaki döletni parchilimaqchi bolidiken, biz shübhisizki ularni basturimiz " didi. Uyghur aptonom rayoni partkomining mu'awin sékritari nur bekri, hökümetning milliy mesililerde musheqqetlik küreshlerge duch kelgenlikini ilgiri sürgen. U, "rayonning ijtima'iy muqimliqini qoghdash we iqtisadni rawajlandurush birinchi wezipimiz " dep tekitligen.

Gerche wang léchüen étnik muqimsizliq yenila rayondiki jiddiy mesile, dep tekitligen bolsimu, lékin buningdin burun aptonom rayonning re'isi isma'il tiliwaldi bu mesilide wang léchüen bilen zit pikirlerni bayan qilip keldi. U, buningdin burun élan qilghan bir bayanatida , Uyghur ili weziyitining nahayiti muqim ikenlikni we yéqinqi bir qanche yildin béri héchqandaq térrorluq weqeliri yüz bermigenlikini ilgiri sürgen.

Xelq'ara kishilik hoquq teshkilatliri xitay da'irilirining Uyghur élide yolgha qoyuwatqan siyasitini tenqidlimekte. Ularning eskertishiche, xitay amérikining térrorchiliqqa qarshi turush urushidin paydilinip, Uyghurlarni basturush siyasitini qanunlashturmaqchi boluwatidu. (Erkin)