Ваң лечүән илида йәнә уйғур мустәқилчилиригә зәрбә беришни тәләп қилди


2006.05.07
Share on WhatsApp
Share on WhatsApp

Хитайниң уйғур елиға тәйинлигән партком секритари ваң лечүән 5-айниң 3-күнидин 5-күнигичә илида тәкшүрүш елип барғанда, шу җайда турушлуқ хитай азадлиқ армийисиниң қисимлири вә қораллиқ сақчи қисимлирини зиярәт қилип, уларниң аптоном район вә или областиниң иҗтимаий муқимлиқини қоғдап, иқтисадий тәрәққиятни илгири сүрүштә төһпә қошқанлиқиға рәһмәт билдүрди.

Бу һәқтики хитай дөләтлик ахбарат оргини шунхуа агентлиқиниң учуридин мәлум болушичә, ваң лечүән ғулҗа, қорғас, нарат айродроми қатарлиқ муһим нуқтилиқ җайларни тәкшүргән болуп, у, 5-май күни өткүзүлгән йиғинида, илиниң әһвалиға аит доклатни аңлап болғандин кейин, аталмиш миллий бөлгүнчиликкә қаттиқ зәрбә беришни тәкитләп," или области бөлгүнчиликкә қарши күрәшниң алдинқи сепидә турмақта, муқимлиқ һәммини бесип чүшиду дегәндә чиң туруп, һәр вақит муқимлиқни қоғдашни" тәшәббус қилған.

Ваң лечүән йәнә "үч хил күчләргә нисбәтән қаттиқ бастуруш, юқири дәриҗидә диққәт қилиш, қаттиқ мудапиә көрүш позитсийисидә туруп, иҗтимаий муқимлиқни капаләткә игә қилиш лазим" дегән. Тарихий пакитларға таянғанда, или 1944-йилидин 1949-йилиғичә мустәқил шәрқий түркистан җумһурийити мәвҗут болған җай, бу йәрдики қаршилиқлар һечқачан тохтап қалған әмәс, 1997-йилидики ғулҗа вәқәси хәлқараға зор дәриҗидә тәсир көрсәтти.(Үмидвар)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.