Ваң лечүән мәмликәт ичи вә сиртидики "үч хил күч" кә қарши йәнә сәпәрвәрлик елан қилди


2006.05.15
Share on WhatsApp
Share on WhatsApp

Дуня җамаәтчилики хитай һөкүмитини хәлқара террорлуққа қарши күрәшни баһанә қилип, уйғурларниң кишилик һоқуқини дәпсәндә қиливатиду, дәп әйибләватқан бир чағда, уйғур аптоном райони парткоминиң секретари ваң лечүән райондики җамаәт хәвпсизлик даирилирини мәмликәт ичи вә сиртидики "үч хил күчләр" гә зәрбә бериш вә уларға қарши мудапиә тәдбирини күчәйтиш тоғрисида йәнә бир қетим агаһландурди.

14- Май күни үрүмчидә чақирилған җамаәт хәвпсизлик идарилири мудирлириниң йиғинида җамаәт хәвпсизлик даирилирини "җиддий вә сәгәк болуш, кризис туйғусини күчәйтишкә " чақирған ваң лечүән, "мәмликәт ичи вә сиртидики үч хил күчләрниң һәрикитигә қарши мудапиә көрүшни күчәйтиш вә зәрбә бериш керәк " деди.

Ваң лечүәнниң әскәртишичә, нөвәттә бөлгүнчиликкә қарши күрәш вәзийити йәнила өткүр болуп, у " биз һәргиз бипәрвалиқ қилмаслиқимиз вә бошашмаслиқимиз керәк " дәйду. Ваң, җамаәт хәвпсизлик органлирини " бәзи вәқәләрниң арқисиға йошурунған һәқиқи әһвалларни игиләшкә" чақирған болсиму, лекин хитай мәтбуатлири буниң қайси вәқәләр икәнликини тилға алмиди.

Йиғинда аптоном районниң рәиси исмайил тиливалди, " шинҗаңда бөлгүнчиликкә қарши күрәшниң узун - муддәтликлики вә мурәккәпликини чоңқур тонуш керәк " дәйду. Сияси қанун комитетиниң секритари җаң шюмиң йиғинда, җамаәт хәвпсизлик органлирини " асасий қатлам қурулушини күчәйтиш " кә чақирған. Лекин америка ташқи ишлар министирлиқи 2005 - йилдики кишилик һоқуқ доклатида, бейҗиң даирилирини хитай көчмәнлирини йөләш вә уйғурларни иқтисади, сияси вә иҗтимаий ишларда чәткә қеқиш билән әйиблиди. (Әркин)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.