Ваң лечүән йәнә рабийә ханимни һуҗум нишани қилди


2006.10.16
Share on WhatsApp
Share on WhatsApp

Уйғур аптоном райони парткоминиң секретари ваң лечүән йәнә, уйғур миллий һәрикитиниң рәһбири вә 2006‏- йиллиқ нобил тинчлиқ мукапатиниң намзати рабийә қадир ханимни һуҗум нишани қилди.

Дүшәнбә күни, хитай һөкүмитиниң уйғурларға қаратқан диний бесим сияситини ақлаш үчүн үрүмчидә мухбирларни күтүвелиш йиғини өткүзгән ваң лечүән, уйғур миллий һәрикитиниң рәһбири рабийә қадир ханимниң чәтәлләрдә елип бериватқан паалийитини қаттиқ тәнқид қилди. У рабийә ханимни, вәтинигә хиянәт қилған дәп әйиблиди.

Ройтрис агентлиқиниң үрүмчидин хәвәр қилишичә, ваң лечүән мухбирларни күтүвелиш йеғинида, хитай һөкүмитиниң уйғур паалийәтчилирини бастуруш сияситини ақлашқа тиришқан һәмдә хитай һөкүмитиниң шинҗаңдики асаслиқ нишани йәрлик хәлқләрниң миллий мәдәнийитини қоғдаш әмәс, турмуш сәвийисини юқири көтүрүш, дегән.

Сөзидә мәдәнийәт һаятиниң хәлқниң қорсиқиниң тоқлуқи билән зич мунасивәтлик икәнликини билдүргән ваң лечүән, әгәр хәлқниң йетәрлик озуқлуқи болмиса, усул ойнап, нахша ейталмайду, дәп көрсәткән. Ройтрис агентлиқиниң хәвиридә билдүрүшичә, гәрчә ваң лечүән террорчилиққа қарши һәрикәтниң дин билән мунасивәтлик әмәсликини тәкитлигән болсиму, лекин хитай һөкүмити диний әркинлик тәләп қилған уйғур паалийәтчилирини чәтәлләрдики террорлуқ тәшкилатлири билән алақиси бар дәп әйибләп, уларға қарши бастуруш һәрикити елп бармақта һәмдә уйғур елидә яшаватқан уйғурлар, хитай һөкүмитиниң балилириға һәтта өз өйлиридиму диний тәлим тәрбийә беришни чәклигәнликини билдүрмәктә. (Қанат)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.