Wang léchüen yene rabiye xanimni hujum nishani qildi

Uyghur aptonom rayoni partkomining sékrétari wang léchüen yene, Uyghur milliy herikitining rehbiri we 2006‏- yilliq nobil tinchliq mukapatining namzati rabiye qadir xanimni hujum nishani qildi.

Düshenbe küni, xitay hökümitining Uyghurlargha qaratqan diniy bésim siyasitini aqlash üchün ürümchide muxbirlarni kütüwélish yighini ötküzgen wang léchüen, Uyghur milliy herikitining rehbiri rabiye qadir xanimning chet'ellerde élip bériwatqan pa'aliyitini qattiq tenqid qildi. U rabiye xanimni, wetinige xiyanet qilghan dep eyiblidi.

Roytris agéntliqining ürümchidin xewer qilishiche, wang léchüen muxbirlarni kütüwélish yéghinida, xitay hökümitining Uyghur pa'aliyetchilirini basturush siyasitini aqlashqa tirishqan hemde xitay hökümitining shinjangdiki asasliq nishani yerlik xelqlerning milliy medeniyitini qoghdash emes, turmush sewiyisini yuqiri kötürüsh, dégen.

Sözide medeniyet hayatining xelqning qorsiqining toqluqi bilen zich munasiwetlik ikenlikini bildürgen wang léchüen, eger xelqning yéterlik ozuqluqi bolmisa, usul oynap, naxsha éytalmaydu, dep körsetken. Roytris agéntliqining xewiride bildürüshiche, gerche wang léchüen térrorchiliqqa qarshi heriketning din bilen munasiwetlik emeslikini tekitligen bolsimu, lékin xitay hökümiti diniy erkinlik telep qilghan Uyghur pa'aliyetchilirini chet'ellerdiki térrorluq teshkilatliri bilen alaqisi bar dep eyiblep, ulargha qarshi basturush herikiti élp barmaqta hemde Uyghur élide yashawatqan Uyghurlar, xitay hökümitining balilirigha hetta öz öyliridimu diniy telim terbiye bérishni chekligenlikini bildürmekte. (Qanat)

Buni bésish arqiliq, pikringizni yézing

• Print
• Hembehr
• Ewetish

Barliq pikir - bayanlarni körüsh.

• Bügünki anglitish
• Ilgiriki anglitishlar