Ваң лечүән җәнубий районларниң намратлиқ сәвәби һәққидә тохталди


2006.10.19
Share on WhatsApp
Share on WhatsApp

Хитай һөкүмитиниң, уйғур аптоном райониға бекитип бәргән әмәлдари ваң лечүән, йеқинда қәшқәр, хотән қатарлиқ җәнубтики 3 вилайәт , областниң вәкиллирини қобул қилип, бу районларниң намрат вә арқида қелиштики сәвәбләр һәққидә тохталди.

Тәңритағ тори 19 ‏- өктәбир күни, ваң лечүәнниң сөзини нәқил кәлтүрүп мундақ дәйду" :гәрчә җәнубтики үч вилайәт ,областниң тәрәққияти наһайити тез йүксиливатқан болсиму, бирақ тарихий, тәбиий шараитниң тосалғулири түпәйли, бу район йәнила бир қәдәр намрат һесаблиниду" .

Бу арида дуня уйғур қурултийиниң баянатчиси дилшат ришит дәрһал баянат елан қилип": хитай рәһбәрлири, уйғур елиниң җәнубидики районларниң тәрәққи қилмаслиқтики түп сәвәбини, ваң лечүән тәкитлигәндәк тарихий вә тәбии шараитқа артип кәлгән болуп, һөкүмәт бу земиндин чиққан байлиқларни әнә шу тарихий вә тәбии шараитни өзгәртиш вә яхшилашқа сәрп қилған әмәс" дәп көрсәтти.

Хитай даирилири уйғурларға изчил түрдә пиланлиқ туғут сияситини йолға қоюп кәлгән болуп, ваң лечүән йәнә, җәнубта нопусниң тез сүрәттә өсүши, тәрәққиятқа тосқунлуқ яритиватқан йәнә бир муһим амил икәнликини , шуниң үчүн җәнубтики районларда пиланлиқ туғут сияситини изчил давамлаштурушни оттуриға қойди.

Уйғур өктичилири болса, хитайниң пиланлиқ туғут сияситини уйғурларни йоқ қилишниң асаслиқ чариси дәп тәнқид қилмақта. (Әқидә)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.