Уйғур аптоном райони парткоминиң секритари ваң лечүән "малийә" журнилида хиянәтчилик билән әйибләнди


2007.01.22
Share on WhatsApp
Share on WhatsApp

Хитай чоң қуруқлуқидики "малийә" журнилида уйғур аптоном райони парткоминиң секритари ваң лечүән, ху бей өлкилик партком секритари йүй җиңшиң вә муавин дөләт рәиси зең чиңхуңлар сәндуң луниң гуруһиниң пай чекини икки хусусий ширкәткә өткүзүп бериш содисида хиянәтчиликкә четилип қелиш билән әйибләнди.

"Малийә" журнилиниң әскәртишичә, сәндуң луниң ширкәтләр гуруһиниң 73 милярд 800 милйон йүәнгә ярайдиған 6.91 Пирсәнтлик пай чекини бейҗиңдики шовда енергийә чәклик ширкити билән бейҗиң гойүән бирләшмә чәклик ширкитидин ибарәт икки хусусий ширкәткә 3 милярд 700 милйон йүәнгә сатқан.

"Малийә" журнили бу содиниң арқисида ваң лечүән, йүй җиңшиң вә зең чиңхуңларниң қоли барлиқини билдүрди. "Малийә" журнили 8 - январ күни елан қилған бу һәқтики мақалигә " луниң ширкити кимниңки? " дәп мавзу қойған.

Луниң ширкити дөләт игиликидики електир ениргийә ширкити болуп, сәндуңдики әң чоң карханиларниң бири иди. Көзәткүчиләр, ваң лечүәнниң зең чиңхуңлар қатарида мәзкур хиянәтчилик сәтчиликигә четилип қалғанлиқини тасадипи әмәс, дәп қаримақта. Ваң лечүән, сәндуң тәвәликидики хитай болсиму, лекин уйғур аптоном райони тарихида сияси бюроға рәсмий әза болған тунҗи партком секритари болуп, сәндуңлуқларниң уйғур аптоном районидики сода санаәт паалийитидә көврүклик рол ойнимақта иди. (Әркин)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт