Wang léchüen bu ay ichide qazaqistanni ziyaret qilmaqchi
2006.11.06
Rayonda yolgha qoyuwatqan siyasiti Uyghur tili we medeniyitini yoqitish, Uyghur kishilik hoquqini depsende qilish bilen eyiblen'gen Uyghur aptonom rayoni partkomining sékrétari wang léchüen, bu ay ichide qazaqistanni ziyaret qilidu.
Qazaqistan tashqi ishlar ministirliki bayanatchisi yérjan ashiqbayéwning düshenbe küni ashkarilishiche, wang léchüen 13 - noyabirdin 14 - noyabirgiche qazaqistanni ziyaret qilidiken. Lékin ashiqbayéw wangning qeyerlerde ziyarette bolidighanliqini ashkarilimidi. U peqet bu ziyaretning " shinjang bilen soda, iqtisadi, meblegh sélish we rayon xaraktirlik hemkarliqni ilgiri sürüsh" üstide bolidighanliqini bildürdi.
Xitay qazaqistanning néfit we teb'iy gaz bayliqigha jiddi éhtiyaj boliwatqan dölet bolup, Uyghur aptonom rayoni ikki dölet néfit - teb'iy gaz sodisidiki qatnash tügüni. Atasu - alataw néfit turubisi bolsa ikki dölet énérgiye hemkarliqining mehsuli.
Qazaqistan, tashqi dunyada Uyghurlar eng köp olturaqlashqan dölet bolup, qazaqistandiki Uyghurlarning weziyitige pewqul'adde sezgür mu'amile qilmaqta. Qazaqistan, béyjing da'irilirining sherqiy türkistan musteqilchi küchlirini basturushigha yardemlishiwatqan shangxey hemkarliq guruhidiki shériklirining biri. Qazaqistan hökümiti téxi bu yazdila yüsüp qadir qatarliq ikki neper Uyghur siyasi musapirini xitaygha ötküzüp bergen. Xitay hökümiti hazirgha qeder bu ikki Uyghur musapirning qeyerde tutup turuliwatqanliqini élan qilip baqmidi.
Ashiqbayéw, rayon xaraktérlik hemkarliqning qaysi konkrét mezmunlarni öz ichige alidighanliqini we wang léchüenning konkirit ziyaret küntertipini ashkarilimidi. (Erkin)
Munasiwetlik maqalilar
- Xitay hökümiti wang léchu'enni musulmanlar köp sanliqni teshkil qilidighan Uyghur aptonom rayonining bashliqliqigha qaytidin belgilidi
- Wang léchüen yene atalmish " üch xil küchler" heqqide toxtaldi
- Wang léchüen jenubiy rayonlarning namratliq sewebi heqqide toxtaldi
- Wang léchüen yene rabiye xanimni hujum nishani qildi
- Kéler hepte ürümchide ottura asiya rayoni iqtisadiy hemkarliq programmisining yéghini ötküzülidu