Ху җинтав уйғур аптоном райониниң вәкиллири билән көрүшти

Хитай дөләт рәиси ху җинтав 10 -нөвәтлик хитай хәлқ қурултийиниң 3 - қетимлиқ йиғинида 60 нәпәр уйғур аптоном райони вәкиллири билән айрим көрүшүп, хитайниң ғәрбни ечиш сияситини йәнә давамлаштуридиғанлиқини билдүрди.

Тәңритағ хәвәр ториниң мәлуматиға қариғанда, ху җинтав билән болған сөһбәттә, уйғур аптоном райони рәиси исмайил тиливалди уйғур елиниң әмәлий әһвалидин доклат берип, уйғур елиниң йәр тәврәш апити районидики орунлаштуруш ишлириниң оңушлуқ елип берилғанлиқини билдүрди.

Ху җинтав пәйзиват вә мәкиттики йәр тәврәштә апәткә учриған хәлқниң һәммиси йәр тәврәшкә бәрдашлиқ берәләйдиған өйләргә кирәлидиму? дәп сориғинида, хитайниң уйғур елидики партком секритари ваң лечүән, апәт районидики барлиқ хәлқләрниң өлчәмлик өйләргә кирип болғанлиқини көрсәткән.

Ваң лечүән йәнә, уйғур елиниң намрат районлиридики 2 милйон 500 миң кәмбәғәл оқуғучиниң һәқсиз маарипқа еришкәнликини ейтқанда, ху җинтав хушаллиқ билән " наһайити яхши, силәр техи бир қәдәм алдида меңипсиләр" дегән.

Нурғун күзәткүчиләр, аптоном райони рәһбәрлириниң давамлиқ уйғур елидики мәвҗут һәқиқий мәсилиләрни оттуриға қоймайдиғанлиқини, әмәлийәттә болса, уйғур елидики намратчилиқниң һечқанчә һәл болмиғанлиқини билдүрмәктә. Һәтта биз илгири телефон қилған үчтурпан наһийисидики өзини һаллиқ сәвийидә һесаблайдиған бир деһқан униң йиллиқ кириминиң аран 150 юән әтрапида икәнликини билдүргән иди. (Пәридә)