Amérika dölet mejlisining ürümchini ziyaret qilish ömiki ziyaritini yérim yolda toxtitip amérikigha qaytti

Uyghur aptonom rayonida tekshürüsh élip baridighan we qeshqerni ziyaret qilmaqchi bolghan amérika dölet mejlisining ziyaret ümiki ziyaritini yérim yolda toxtitip amérikigha qaytti.

Weqedin xewerdar erbaplarning ashkarilishiche, amérika dölet mejlisining 13 kishilik ziyaret ömiki, rabiye qadirning 2 oghli xitay saqchiliri teripidin qolgha élin'ghanliqini we bir qizining a'iliside nezerbend qilin'ghanliqini uqqandin kéyin, Uyghur aptonom rayoni da'irilirige naraziliq bildürgen we "bu ehwalda Uyghur aptonom rayonini dawamliq ziyaret qilishning ehmiyiti qalmidi" dep qarap ürümchidin ayrilghan.

Xewer menbelirining ashkarilishiche, ular esli béyjingda xitay tashqi ishlar ministirliqi we xelq qurultiyining mes'ulliri bilen söhbet ötküzmekchi idi. Lékin ziyaret ömiki xitaylar bilen söhbet ötküzüsh pilanini bikar qilghan. Igilishimizche, ziyaret ömiki jüme küni béyjingdin amérikigha qarap yolgha chiqqan. Xewer yéziliwatqan mezgilde ular seper üstide idi.

Xitay da'iriliri peyshenbe küni Uyghur kishilik hoquq we démokratiye herikitining rehbiri rabiye qadirning alim abduréhim we ablikim abduréhim isimlik ikki oghlini we qizi roshen'gül abduréhimni qolgha alghan. Gerche nöwette roshen'gül abduréhim qoyup bérilip a'iliside nezerbend qilin'ghan bolsimu, lékin alim we ablikim abduréhimlarrning qeyerge élip bérilghanliqini hazirghiche élan qilmidi.

Saqchilar peyshenbe küni rabiye qadirning 4 newre we jiyenini, küy'oghli, kélini we 3 perzentini aptobusta ulanbaygha élip bérip ablikim bilen alimni urghan. Rabiye qadir a'ilisining ashkarilishiche, ablikim hazir doxturxanida bolushi mumkin. (Erkin)