Хитай сиясий кеңәш әзаси"шинҗаң"маарипиниң әһвалидин үмидвар әмәс


2008.03.07

Хитай сиясий мәслиһәт кеңишиниң әзаси, хитай пән ‏ - техника университетиниң мудири җу чиңши тәңритағ ториниң зияритини қобул қилип, уйғур елиниң маарип әһвалидин үмидвар болуп кетишкә болмайдиғанлиқини билдүрди.

Җу чиңши бу сөзләрни тәңритағ тори мухбириниң уйғур или маарип ишлириниң әһвали һәққидики суаллириға җаваб бәргәндә тәкитлигән болуп, у уйғур или маарип муәссәсилириниң арқида қалғанлиқини,"шинҗаңдики намрат районларда нурғун мәктәпләрниң оқутуш муәссәсилири 20 - 30 йил авалқидин көп өзгәрмигән, биологийә, химийә тәҗрибиханилириниң %80 ини ишләткили болмайдиған, дәрстин сиртқи паалийәт үскүнилири интайин кона, компютер қатарлиқ үскүниләр интайин кәмчиллики"ни әскәртиду.

Җу чиңши йәнә, бу районларда оқутқучилар қошуниниң йетишмәслик әһвали наһайити еғир икәнлики үстидә тохтилип,"бәзи мәктәпләрдә бир оқутқучи бир қанчә йиллиқтики оқуғучиларға бир қанчә хил дәрс беридиған,.....Бәзи мәхсус пән оқутқучилири мәктәптики барлиқ йиллиқларға дәрс беридиған" әһвалларни тәнқид қилди. Шуңа мәбләғ сиелинмисини көпәйтишни тәләп қилған җу чиңши, "бундақ әһвалда сапа маарипидин қандақму еғиз ачқили болсун," дәйду.

Хитай баш министири вен җябав хәлқ қурултийида бәргән доклатида маарип баравәрликини тәкитлигән. Хитайниң муавин маарип министири җаң шинчиң болса вен җайбавниң бу сөзини " шинҗаңға нисбәтән ейтқанда, кишини һаяҗанландуридиған вә илһамландуридиған хушхәвәр " дәйду. Хитайниң маарип сияситини тәнқид қилғучилар, районда хитай маарипи билән уйғур миллий маарипи арисидики пәрқниң чоңийиватқанлиқини, бу уйғурларда пәрзәнтлирини хитай мәктәплиригә бериш қизғинлиқи қозғап, уйғур мәктәплириниң чөлдәрәп қелишиға сәвәб болуватқанлиқини агаһландурмақта иди. (Әркин)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.