Уйғур районида икки америка ширкити үстидин тақаш буйруқи чиқирилди

2007-10-10
Елхәт
Пикир
Share
Принт

Христиан ахбарат ториниң 10 ‏-өктәбир тексастин хәвәр қилишичә, хитай даирилири , уйғур районида тиҗарәт билән шуғуллиниватқан икки америка ширкитини, христиан тәрғибатчилиқи билән әйибләп, ширкәтниң тиҗарәт кинишкисини бикар қилған һәм ширкәт игилириниң хитайда туруш визисини әмәлдин қалдурған.

Мәзкур ахбарат тори бу хәвәрни америкиниң тексас штатида паалийәт елип бериватқан хитай һәмкарлиқ җәмийити тәрипидин қолға чүшүрүлгән бир мәхпий һөҗҗәткә асаслинип игилигән. Мәхпий һөҗҗәт уйғур районидики мәлум бир вилайәтниң миллий ишлар идарисиға аит болуп, һөҗҗәттә, икки ширкәттин бери, 2000 ‏-йилдин буян , тиҗарәт нами астида қанунсиз диний паалийәтләр билән шуғулланған дәп әйибләнгән һәм конкрет паалийәтлири сүпитидә, христианлиқ һәққидә вәз ейтиш, тәрғибат қилиш вә тәлимат материяллири тарқитиш дәп көрсәткән.

Тақилишқа буйрулған ширкәтләрдин йәнә бири уйғур районида 16 йилдин бери тиҗарәт қиливатқан болуп бу ширкәтму охшаш намда әйиблиниш билән биллә, тиҗарәт кинишкиси инавәтсиз қилинған вә ширкәт саһибиниң хитайда турушлуқ визиси инавәтсиз қилинип, 30 ‏-сентәбиргә қәдәр чеградин чиқип кетиш әмри берилгән.

Хәвәрдә йәнә, уйғур районидики икки йәрлик ширкәтниңму, хиристиан тәрғибатчилиқи билән җазаланғанлиқи билдүрүлгән.

Мәзкур хәвәр тори, йеқинқи алтә ай ичидә, уйғур районидин 50 тин артуқ хиристианниң қанунсиз диний паалийәт билән шуғулланди дәп әйиблинип чеградин чиқирилғанлиқи билдүрүлгән. Хитай һәмкарлиқ җәмийити бу һәқтә " диний паалийәтләргә четип туруп, тиҗарәттин чәкләш хитайдики йәнә бир түр диний бесимдур" дәп билдүргән.

Пикирләр (0)
Share
Толуқ бәт