Хитай һөкүмити уйғур елигә пахта теришкә барған көчмән хитайларни мукапатлимақчи

Үрүмчи хәвәр ториниң 7- авғусттики хәвиридин ашкарилинишиға қариғанда , йеқинда хитай һөкүмити йәниму көп хитай көчмәнлирини уйғур елигә келип пахта теришкә риғбәтләндүрүш үчүн , бир қатар етибар бериш һәмдә иқтисадий җәһәттин йөләш сиясәтлирини чиқарған. Йәни мәзкур сиясәттә бәлгилинишичә, хитай өлкилиридин бу йил уйғур елигә пахта териш әмгикигә қатнишиш үчүн кәлгән хитай ишләмчиләргә күнигә икки йүәндин турмуш ярдәм пули бәргәндин башқа , уларниң келип ‏- кетиш қатнаш һәққиниму көтиридикән шундақла һәр бир пахта йиққучиниң иш һәққигә %5 тин мукапат пули қошуп беридикән.

Һазирға қәдәр чуңчиңдин 1100 аққун уйғур елигә келип пахта теришкә қатнишиш келишимигә қол қойған болуп , чуңчиң йәрлик һөкүмити бу хитай ишчилирини риғбәтләндүрүш сиясәтлирини әмәлийләштүрмәктә икән.

Хәвәрдә чуңчиң шәһәрлик әмгәк идарисиниң мәсулиниң сөзини нәқил кәлтүрүшичә "бултур охшаш мәзгилдә чуңчиңда қурғақчилиқ апитидә қалған 100 миң хитай деһқан уйғур елигә келип пахта теришкә қатнишип икки йүз милйон йүән тепип кәткән." Бу йилму хитайниң көпинчә җайлири еғир қурғақчилиқ һәмдә кәлкүн апәтлиридә қалған болуп , һөкүмәт даирилири апәттә қалған хитай деһқанларни уйғур ели қатарлиқ җайларға берип ишләп пул тепишқа риғбәтләндүрмәктә.

Әксичә болса , уйғур елидики йеза әмгәк күчлири мәҗбурий һалда хитай өлкилиридә ишләшкә орунлаштурулмақта шундақла хитай өлкилиригә ишләшкә барған уйғурлар барлиқ қатнаш һәм турмуш чиқимлирини өзлири үстигә алмақта . Уйғурларниң инкаслириға қариғанда , хитай өлкилиригә ишләмчиликкә барған уйғурлар хитай завутлирида төвән мааш билән һәддидин зиядә еғир һәм узун вақит әмгәккә селинип һоқуқ мәнпәәтлири дәпсәндә қилинмақта икән. (Гүлчеһрә)