Xitay hökümiti Uyghur élige paxta térishke barghan köchmen xitaylarni mukapatlimaqchi

Ürümchi xewer torining 7- awghusttiki xewiridin ashkarilinishigha qarighanda , yéqinda xitay hökümiti yenimu köp xitay köchmenlirini Uyghur élige kélip paxta térishke righbetlendürüsh üchün , bir qatar étibar bérish hemde iqtisadiy jehettin yölesh siyasetlirini chiqarghan. Yeni mezkur siyasette belgilinishiche, xitay ölkiliridin bu yil Uyghur élige paxta térish emgikige qatnishish üchün kelgen xitay ishlemchilerge künige ikki yüendin turmush yardem puli bergendin bashqa , ularning kélip ‏- kétish qatnash heqqinimu kötiridiken shundaqla her bir paxta yiqquchining ish heqqige %5 tin mukapat puli qoshup béridiken.

Hazirgha qeder chungchingdin 1100 aqqun Uyghur élige kélip paxta térishke qatnishish kélishimige qol qoyghan bolup , chungching yerlik hökümiti bu xitay ishchilirini righbetlendürüsh siyasetlirini emeliyleshtürmekte iken.

Xewerde chungching sheherlik emgek idarisining mes'ulining sözini neqil keltürüshiche "bultur oxshash mezgilde chungchingda qurghaqchiliq apitide qalghan 100 ming xitay déhqan Uyghur élige kélip paxta térishke qatniship ikki yüz milyon yüen tépip ketken." Bu yilmu xitayning köpinche jayliri éghir qurghaqchiliq hemde kelkün apetliride qalghan bolup , hökümet da'iriliri apette qalghan xitay déhqanlarni Uyghur éli qatarliq jaylargha bérip ishlep pul tépishqa righbetlendürmekte.

Eksiche bolsa , Uyghur élidiki yéza emgek küchliri mejburiy halda xitay ölkiliride ishleshke orunlashturulmaqta shundaqla xitay ölkilirige ishleshke barghan Uyghurlar barliq qatnash hem turmush chiqimlirini özliri üstige almaqta . Uyghurlarning inkaslirigha qarighanda , xitay ölkilirige ishlemchilikke barghan Uyghurlar xitay zawutlirida töwen ma'ash bilen heddidin ziyade éghir hem uzun waqit emgekke sélinip hoquq menpe'etliri depsende qilinmaqta iken. (Gülchéhre)