Ғәрбкә ярдәм бәргүчи "пидаийлар" әслидә хизмәт қайғусидики көчмәнләр болуп чиқти

Уйғур аптоном райони яшлар иттипақи 2003 ‏- йилдин башлап ичкирилик хитайларни уйғур елидә қәрәллик"пидаий"болуп ишләшкә тәклип қилиш паалийити йолға қойғандин буян, өзини уйғур елидә 1 йилдин 2 йилғичә пидаий болуш ишләшкә тизимлатқан 3900 гә йеқин хитайниң аз кәм 4 дән бири, пидаийлиқ қәрәли тошқандин кейин юртиға қайтмай уйғур елидә хизмәт тепип йәрлишип қалған.

Шинхуа ахбарат агентлиқи, уйғур елидә йәрлишип қалған аталмиш пидаийларниң 700 гә йетидиғанлиқини билдүрди. Бу кишиләр яшлар иттипақиниң уйғур елигә ярдәм бериш шуари астида тохтам билән "пидаий" болуп ишләшкә кәлгәнләр болуп, улар асасән җиминәй қатарлиқ чегра районлардики чәт наһийиләрдә ишлигән вә қәрәли тошқандин кейин юртиға қайтмай бу наһийиләрдә хизмәт тепип қелип қалған.

Уйғур аптоном райони яшлар иттипақи тәшвиқат бөлүминиң муавин башлиқи сәй ренруң, уйғур елидә қалған "пидаийлар"ниң маарип, сәһийә - саламәтлик вә йеза игилик , техника саһәсидә хизмәт тапқанлиқини билдүрмәктә. Хитай мәтбуатлириниң әскәртишичә, җиминәй наһийисигә орунлаштурулған 132 нәпәр "пидаий"ниң 37 нәпири мушу наһийиниң өзидә қалған.

Чәтәлдики уйғур тәшкилатлири әң тәкитләйдиған чақириқларниң бири, хитай көчмәнлирини йөткәшни тохтитиштур . Уйғур аптоном райониниң рәиси исмаил тиливалди, илгири районға келиватқан хитай көчмәнлирини тәшкиллик әмәс, базар игиликиниң еһтияҗидин келиватқанлар, дәп тәкитлигән болсиму, лекин хитай даирилириниң районға тәшкиллик һалда көчмән йөткәватқанлиқини илгири сүргүчи тәшкилатлар, хитай көчмәнлирини уйғурларниң мәдәнийитини, районниң муһитини вәйран қилиш ролини ойнаватиду, дәп әйиблимәктә. (Әркин)