Xitay géziti sherqiy türkistanchilarning nishani olimpik mesh'ilige qaritilghanliqini ilgiri sürdi

Shinxu'a torining tarmiqidiki "xelq'ara awan'gart yétekchi" géziti jüme küni maqale élan qilip, xitayning olimpik mesh'ilini qoghdash üchün Uyghur élide alghan bixeterlik tedbirlirini aqlidi.
Muxbirimiz erkin xewiri
2008-05-30
Share

"Sherqiy türkistanchilarning qesti 6‏ - aydiki mesh'elni yetküzüsh pa'aliyitide" dégen mawzudiki maqalide, " sherqiy türkistan islam herikiti" we " sherqiy türkistan azadliq teshkilati" ning ürümchi, béyjing, shangxeyde tesiri zor kölemlik weqe peyda qilishni pilanlighanliqini, dunya Uyghur qurultiyining bolsa bu guruhlargha qelem jehette maslashqanliqini ilgiri sürgen.

Maqalide dunya Uyghur qurultiyi re'isi rabiye qadir xanimning 5‏ - may küni fransiye agéntliqigha bergen bayanatigha baha bérip, uning "xitay Uyghur élige olimpik mesh'ili yetküzüsh bahanisida Uyghurlarni basturuwatidu "dégen sözlirini we olimpik mesh'ili yetküzüsh pilanini bikar qilish chaqiriqini tenqid qildi.

Maqalide yene , dunya Uyghur qurultiyi bayanatchisi dilshat rishitning " olimpik mesh'ili Uyghur xelqighe kishilik hoquq apiti élip kelmekte " dégen sözlirini " qalaymiqan jöyligenlik " deydu. Qurultay bash katipi dolqun eysaning yaponiye ziyaritide, "xitay sherqiy türkistanda medeniyet qirghinchiliqi élip bériwatidu " dégen sözlirini " ighwa " dep tenqid qildi.

Olimpik mesh'ili 6‏‏ - ayning 25‏ - künidin 27 ‏ - künigiche ürümchi, shixenze, sanji we qeshqer sheherlirige yetküzilidu. Dunya Uyghur qurultiyi xitay da'irilirining mesh'elni qoghdashni bahane qilip, axturush, tekshürüsh ponkitlirini qurush,sewebsiz tutqun qilish, teqiplesh, pasport musadire qilish, sayahetni cheklesh yolgha qoyiwatqanliqini ilgiri sürgen. Xelq'ara kechürüm teshkilati yéqinda élan qilghan doklatta xitay da'irilirini térrorchiliqni bahane qilip, Uyghurlarning kishilik hoquqini üzlüksiz depsende qilish bilen eyibligen idi.
Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet