Maxmud qeshqiri, yüsüp xas hajiplarning resimi kuchar nahiyilik ma'arip idarisidiki lyuning nerige putlashti?


2007-12-14
Share

Uyghur élidiki uchur menbelirining xewer qilishiche, kuchar nahiyilik ma'arip idarisining bashliqi, ma'arip idarisi partiye guruppisining sékritari lyu jong, kuchar nahiyisining ocha bazar bashlan'ghuch mektipini közdin kechürgende mektep oqutush binasining témigha ésilghan 11 - esirdiki Uyghur mutepekkurliri maxmud qeshqiri bilen yüsüp xas hajipning resimini tamdin yulup élip tashliwetken.

Xewer menbe'eliride, bu weqe 6 - ayning axirlirida sadir bolghanliqini, bu weqe mekteptiki oqutquchi we oqughuchilargha éghir haqaret tuyulghan bolsimu, lékin héchkimning lyu jonggha pétinip bir néme déyelmigenlikini ilgiri sürmekte. Xewerde eskertilishiche, lyu jong "resimdiki bu kishilerning saqili we sellisi bar iken. Mektepke sellilik we saqalliqlarning resimini ésishqa bolmaydu," dep tekitligen.

Weqe yüz bergende nahiyilik ma'arip mupettish idarisining bashliqi memet niyaz shu meydanda bar bolup, u lyu jong tashliwetken maxmud qeshqiri bilen yüsüp xas hajipning resimini élip téximu yiraqqa atqan. Weqe yüz bergendin kéyin mekteptiki oqutquchilar lyu jong we memet niyazlarning herikitini sürüshtürüshni telep qilip, nahiyidiki munasiwetlik organlar bilen alaqilashqan bolsimu, lékin da'iriler hazirgha qeder bu weqeni sürüshtürmigen we héchkimningmu kari bolmighan.

Maxmud qeshqeri we yüsüp xas hajiplar 11 - esirde yashighan Uyghur tarixidiki meshhur tilshunas we mutepekkurlar bolup, ular yene kishilerning neziride Uyghur ilim - pen rohining simwoli, dep qaralghan zatlar idi. (Erkin)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet