Uyghur aptonom rayonluq wekiller ömiki özbékistanni ziyaret qilmaqta

Uyghur aptonom rayonluq tashqi soda we iqtisadiy hemkarliq idarisining mu'awin re'isi li jinyün bashchiliqida bir xitay wekiller ömiki özbékistan soda sana'etchiler birleshmisining teklipi bilen özbékistanni ziyaret qilmaqta.

16 Kishidin teshkil tapqan Uyghur aptonom rayonluq bu wekiller ömikining ziyaretning meqsiti, özbékistan bilen xitay soda we tijaret da'iriliri otturisidiki hemkarliqini téximu kücheytish we xitay tijaretchilirini özbékistanda meblegh sélishqa reghbetlendürüshtin ibaret iken.

Özbékistan tijaret we sana'etchiler birleshmisining bildürüshiche, xitay wekiller ömiki tashkentdin bashqa yene semerqend, buxara, xéwe sheherlirinimu ziyaret qilidiken.

Tashkentdiki xitay bash elchixanisining tijaret we soda ishliri xadimi jan di, xitay shirketlirining ötken yili özbékistan'gha salghan meblighining 30 milyon amérika dollirigha yetkenlikini tekitlep, emma bu nahayiti az, xitay hökümiti xitay shirketlirini özbékistan'gha téximu köp meblegh sélish üchün reghbetlendüridu, dédi.

Xitay özbékistanning dunyadiki eng chong tijaret shiriklirining biri hésablinidu. Ikki dölet otturisidiki tijaret hejmi ötken yili 480 milyon amérika dollirigha yetken idi. Bu yil xitay bilen özbékistan otturisidiki tijarette zor ilgirlesh meydan'gha kelgen bolup, 2006 ‏- yilining birinchi üch yilidiki ikki dölet otturisidiki tijaret hejmi 196 milyon'gha yetken.

Siyasiy mulahizichiler, Uyghur aptonom rayunluq hökümet wekiller ömikining, özbékistan hökümitining kanada puqrasi hüsenjan jililni xitaygha tapshurup bérishidin ikki hepte kéyin, özbékistanni ziyaret qilghanliqigha diqqet tartmaqta. (Qanat)