Қазақистан билән хитай или, ертиш дәрялириниң сүйини ишлитиш мәсилисини музакирә қилди

Қазақистан - хитай чегра һалқиған дәря сулирини ортақ башқуруш комитети 16 - өктәбирдин башлап или вә ертиш дәрялириниң сүйидин қандақ пайдилиниш мәсилиси үстидә 4 - қетим йиғин өткүзмәктә.

Оттура асия мәтбуатлириниң хәвәр қилишичә, 21 - өктәбиргичә давамлишидиған бу йиғинда тәрәпләр икки дөләт арисидики дәрялар һәққидә учур алмаштуруш, дәря сүйиниң пакизлиқини қоғдаш вә көзитиш понкитлирини қуруш тоғрисида бир қатар келишимләр имзалиши мумкин. Бу қетимқи йиғин хитай қазақистан вә русийилик екологларниң или вә ертиш дәря сүйини өлчәмдин көп ишләтмәктә, дәп әйиблишигә учраватқан бир мәзгилдә чақирилди.

Қазақистан вә русийилик екологлар хитайниң ертиш вә или дәря сүйини өлчәмдин көп ишләткәнлики балқаш вә зайсан көлириниң қуруп кетишни кәлтүрүп чиқириду, дәп агаһландурмақта. Хитай ертиш дәрясиниң бир қисим сүйини җуңғар қанили билән қарамайға башлиди. Улар бу қанални үрүмчигичә йәткүзмәкчи болуватиду. Хитай или дәря вадисида нурғун су амбарлирини қурған вә көчмән нуқтилирини бәрпа қилған.

Мутәхәссисләр, или дәряси сүйиниң азлап кетишиниң, қазақистан тәрәптики йеза -кәнтләрни вә деһқанчилиқ районлирини вәйран қилишидин әнсиримәктә. Мутәхәссисләр, хитай дәря сүйини ишләткәндә чоқум екологийилик муһитни қоғдиши керәк, дәп тәкитлигән. (Әркин)