Qazaqistan bilen xitay ili, értish deryalirining süyini ishlitish mesilisini muzakire qildi

Qazaqistan - xitay chégra halqighan derya sulirini ortaq bashqurush komitéti 16 - öktebirdin bashlap ili we értish deryalirining süyidin qandaq paydilinish mesilisi üstide 4 - qétim yighin ötküzmekte.

Ottura asiya metbu'atlirining xewer qilishiche, 21 - öktebirgiche dawamlishidighan bu yighinda terepler ikki dölet arisidiki deryalar heqqide uchur almashturush, derya süyining pakizliqini qoghdash we közitish ponkitlirini qurush toghrisida bir qatar kélishimler imzalishi mumkin. Bu qétimqi yighin xitay qazaqistan we rusiyilik ékologlarning ili we értish derya süyini ölchemdin köp ishletmekte, dep eyiblishige uchrawatqan bir mezgilde chaqirildi.

Qazaqistan we rusiyilik ékologlar xitayning értish we ili derya süyini ölchemdin köp ishletkenliki balqash we zaysan kölirining qurup kétishni keltürüp chiqiridu, dep agahlandurmaqta. Xitay értish deryasining bir qisim süyini jungghar qanili bilen qaramaygha bashlidi. Ular bu qanalni ürümchigiche yetküzmekchi boluwatidu. Xitay ili derya wadisida nurghun su ambarlirini qurghan we köchmen nuqtilirini berpa qilghan.

Mutexessisler, ili deryasi süyining azlap kétishining, qazaqistan tereptiki yéza -kentlerni we déhqanchiliq rayonlirini weyran qilishidin ensirimekte. Mutexessisler, xitay derya süyini ishletkende choqum ékologiyilik muhitni qoghdishi kérek, dep tekitligen. (Erkin)