Kompartiyining 17 - qurultiyigha "shinjang"din kimler qatnishidu ?


2007.06.08

Uyghur aptonom rayoni partkomi jüme küni ürümchide yighin chaqirip, xitay kompartiyisining bu yil küzde chaqirilidighan memliketlik qurultiyigha Uyghur aptonom rayonidin qatnishidighan wekillerni saylap chiqti shundaqla rayondin qatnishidighan 41 neper wekilning 22 nepiri xitaylardin, 19 nepiri yerlik milletlerdin tallandi.

Xewerlerde 17 - qurultaygha qatnishidighan wekillerning 13 nepiri partiyilik addi puqralar, 28 nepiri bolsa her derijilik partiye rehberliridin tallan'ghanliqini élan qilghan bolsimu, lékin wekillerning isimliki élan qilinmidi. Yighinda Uyghur aptonom rayoni partkomining sékritari wang léchüen, qurultaygha qatnishidighan wekillerning qattiq tekshürüshtin ötkenliki, siyasi'i sapasi we adem qurulmisi ötkilide ching turulghanliqini bildürgen.

Küzetküchilerning eskertishiche, xitay da'iriliri her yili Uyghur aptonom rayonidin xelq qurultiyi yaki partiye qurultiyigha qatnishidighan yerlik millet wekillirini tallashta qattiq siyasiy ölchem qoyup, qurultayda milliy mesililer yaki yerlik puqralar hoquqini qoghdash teklipi bérish ihtimaligha ige kishilerni tallap sélishtin qattiq éhtiyat qilip kelmekte.

Bu yil we ötken yili oxshash mezgilde béyjingda chaqirilghan xelq qurultiyi we siyasiy meslihet kéngishi yighinigha qatnashqan yerlik bezi wekiller térrorizm, bölgünchilikke qarshi turush yaki ichkiri bilen Uyghur éli arisida poyiz yolini köpeytish deydighan yerlik xelqni endishige salidighan teklip-pikirlerni otturigha qoyghan idi. (Erkin)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.