Uyghur ilidiki yerlik qurultaylarda emeldarlarning nisbiti % 25 din éship ketmeslik telep qilindi

Uyghur aptonom rayoni partkomi yéqinda her qaysi jaylargha höjjet chüshürüp, sheher, nahiye, yéza , bazar derijilik yerlik qurultaylarning wekillirini saylighanda, hökümet emeldarlirining wekillik nisbiti%25 din éship ketmeslikni telep qildi. Lékin weqedin xewerdar zatlarning eskertishiche, bu höjjet tewsiye xaraktérlik bolup, yerlik organlar choqum ijra qilishqa tégishlik buyruq emes.

Uyghur aptonom rayoni partkom ishxanisining " nahiye, sheher, rayon, yéza we bazar derijilik xelq qurultéyi, hökümet we siyasi kéngeshning kéler nöwetlik saylam xizmiti teyyarliqini yaxshi ishlesh toghrisidiki " höjjitide, hökümet emeldarlirining nahiye, sheher we rayon derijilik xelq qurultiyida igiligen nisbiti %25 din éship ketmeslik, ishchilar, déhqanlar, ziyaliylar we bashqa xelqlerning igiligen nisbiti 75% din töwen bolup qalmasliqini tekitligen.

Tengritagh torining bu heqtiki xewiride, burun xelq qurultiyigha eza emeldarlar köp bolup kétip, xelqning saylamgha qatnishish we yerliktiki dölet organlirining xizmitige arilishish aktipchanliqigha tesir yetküzgenlikini yazdi.

Lékin rayonning xelq qurultiyi tüzümidin xewerdar erbaplar, bu höjjetning yéngi nerse emeslikini shundaqla bu höjjet yerlik xelq qurultayliridiki wekillik mesilisini hel qilalmaydighanliqini bildürmekte. Ularning eskertishiche, Uyghur ilidiki yerlik xelq qurultaylirida saqliniwatqan mesile, tüzülme xaraktérlik mesile bolup, yerlik xelq qurultaylirining xizmet küntertipini shu derijilik partkomlar bashquridighan ehwalda bu mesililerni bir höjjet bilen hel qilish mumkin emes. (Erkin)