Rabiye qadirning perzentliri ürümchide saqchilar teripidin soraq qilindi

Uyghur kishilik hoquqi we démokratiye herikitining rehbiri rabiye qadirning ürümchidiki perzentliri aldinqi küni xitay saqchiliri teripidin nen'güen saqchixanisigha élip bérilip soraq qilindi. Nen'güen saqchixanisi qarmiqidiki rabiye qadir ishxanisi, dep atlidighan 317 - nomurluq ishxanining saqchiliri peyshenbe küni rabiye qadirning kichik oghli we eqide shirkitining mudiri alim abduréhimni nen'güen saqchixanisigha élip bérip bir yérim sa'et soraq qilghan we uni baj oghrilash jinayiti bilen resmiy "jinayet gumandari" dep eyibleydighanliqini, adwukat teklip qilsa yol qoyudighanliqini uqturghan.

Lékin alim qadir saqchilarning eyiblishini ret qilish bilen birge, ularning baj oghrilighanliqini iqrar qilidighan bir höjjetke qol qoyush telipini ret qilip, adwukat teklip qilishni qobul qilmidi. U, saqchilar méni jinayet gumandari, dep békitidighanliqini bildürgen bolsimu, lékin resmiy eyibnamisini körsetmidi yaki méni qolgha almidi " deydu. Uning eskertishiche, ikki neper saqchi etigendin - kechkiche uning arqisida yürüydiken we shirket ishxanisigha kirishige ruxset qilmaydiken.

Alim abduréhim, ötken yili 5 ‏- ayda jama'et xewpsizlik nazariti eqide shirkitining barliq höjjet we toxtamnamilarni élip chiqip ketkendin kéyin, shirketning sodisi pütünley palech ehwalgha chüshüp qaldi,dep körsetti. U, " qolimizdiki saqchi terepning eyiblishini aqlaydighan pütün höjjetler musadire qilindi. Özimizni aqlaydighan pakitlar jama'et xewpsizlik nazaritining qolida " deydu.

Uyghur aptonom rayoni partkomining sékritari wang léchüen ötken yili rabiye qadirni baj oghrilash we milliy bölgünchiler bilen til biriktürüsh bilen eyibligen idi. Lékin rabiye qadirning eskertishiche,uning shirkiti 1990 ‏- yildin 1998 ‏- yilghiche 18 qétim aptonom rayon we memliket boyiche "baj tapshurush bayraqdari" bolup bahalan'ghan.