Үрүмчидә мәктәпләрдики " қара күч" гуруһларни тазилаш елип берилмақта

Уйғур ели қанун торидин ашкарилинишичә, үрүмчи сақчи даирилири мәхсус мәктәпләрдики зораванлиқ һәрикәтлирини бастуруш үчүн, йеқиндин башлап мәктәпләр вә мәктәп әтрапидики лүкчәк һәм қара күч гуруһлириға зәрбә бериш һәрикитини башлиған.

Игилинишичә , үрүмчи сақчи даирилириниң бу тазилаш һәрикити 11- айниң 8 - күнигичә 40 күн әтрапида давам қилидикән.

Сақчи даирилириниң бу 40 күнлүк тазилаш һәрикити даирисигә үрүмчидики һәр қайси техником мәктәпләр вә толуқ һәм толуқсиз оттура мәктәпләр шуниңдәк башланғуч мәктәп һәм йәслиләрму киргүзүлгән.

Шундақла қанун торида бу һәқтә берилгән хәвәрдә тәкитлинишичә, үрүмчи сақчи даирилири мәзкур һәрикәт арқилиқ оттура һәм техником мәктәпләрниң аманлиқи һәм сиясий муқимлиқ хизмитини чиңитиш билән тәң , башланғуч һәм балилар йәслилиридә тенч һәм бихәтәр муһит яритип ата -ана һәм оқуғучиларни хатирҗәм қилишни мәқсәт қилимиз дәп көрсәткән.

Буниң алдида йәни 20 -сентәбир күни үрүмчи шәһиригә җайлашқан шинҗаң әдлийә сақчи мәктипидә уйғур оқуғучилар билән хитай оқуғучилар арисида бәш йүздин артуқ адәм қатнашқан тоқунуш йүз берип, адәм өлүш вә бир қанчә он киши еғир ярилиништәк зор вәқә йүз бәргән иди. Хәвәрләрдә ейтилишичә, тоқунуш тинчландурулған болуп, тоқунуш җәрянида икки тәрәп калтәк, төмүр қатарлиқ һәр хил нәрсиләрни ишлитип урушқан .Уйғур оқуғучилар билән хитай оқуғучилар арисидики бу тоқунуш һөкүмәт ахбарат васитилирида елан қилиниш қамал қилинған болсиму , лекин бәрибир бу вәқә һәққидики учурлар сиртқа тарқилип кәткән иди. (Гүлчеһрә)