Ürümchide mekteplerdiki " qara küch" guruhlarni tazilash élip bérilmaqta

Uyghur éli qanun toridin ashkarilinishiche, ürümchi saqchi da'iriliri mexsus mekteplerdiki zorawanliq heriketlirini basturush üchün, yéqindin bashlap mektepler we mektep etrapidiki lükchek hem qara küch guruhlirigha zerbe bérish herikitini bashlighan.

Igilinishiche , ürümchi saqchi da'irilirining bu tazilash herikiti 11- ayning 8 - künigiche 40 kün etrapida dawam qilidiken.

Saqchi da'irilirining bu 40 künlük tazilash herikiti da'irisige ürümchidiki her qaysi téxnikom mektepler we toluq hem toluqsiz ottura mektepler shuningdek bashlan'ghuch mektep hem yeslilermu kirgüzülgen.

Shundaqla qanun torida bu heqte bérilgen xewerde tekitlinishiche, ürümchi saqchi da'iriliri mezkur heriket arqiliq ottura hem téxnikom mekteplerning amanliqi hem siyasiy muqimliq xizmitini chingitish bilen teng , bashlan'ghuch hem balilar yesliliride ténch hem bixeter muhit yaritip ata -ana hem oqughuchilarni xatirjem qilishni meqset qilimiz dep körsetken.

Buning aldida yeni 20 -séntebir küni ürümchi shehirige jaylashqan shinjang edliye saqchi mektipide Uyghur oqughuchilar bilen xitay oqughuchilar arisida besh yüzdin artuq adem qatnashqan toqunush yüz bérip, adem ölüsh we bir qanche on kishi éghir yarilinishtek zor weqe yüz bergen idi. Xewerlerde éytilishiche, toqunush tinchlandurulghan bolup, toqunush jeryanida ikki terep kaltek, tömür qatarliq her xil nersilerni ishlitip urushqan .Uyghur oqughuchilar bilen xitay oqughuchilar arisidiki bu toqunush hökümet axbarat wasitilirida élan qilinish qamal qilin'ghan bolsimu , lékin beribir bu weqe heqqidiki uchurlar sirtqa tarqilip ketken idi. (Gülchéhre)