Uyghur élining ijtima'iy muqimliqigha zadi néme tehdit séliwatidu ?

Uyghur aptonom rayoni partkomining sékritari wang léchüen, nöwette Uyghur élining ijtima'iy muqimliqigha tesir yetküzidighan amillarning köp qisimi, xelq ichidiki her xil ziddiyetlerning ötkürliship kétishidin kélip chiqiwatqanliqini bildürgen.

Xitay metbu'atlirining eskertishiche, wang léchüen bu sözlerni kompartiye 17 ‏- qurultiyigha qatnishiwatqan Uyghur ili wekiller ömikining guruppa muzakire yighinida sözligen sözide tekitligen bolup, u sözide yene, rayonning ijtima'iy muqimliqigha tesir körsitiwatqan bezi sezgür mesililerni misalgha alghan. Lékin , xitay metbu'atliri wang léchüenning xelq ichidiki ziddiyetke yatidighan, lékin Uyghur élining ijtima'iy muqimliqigha tesir körsitidighan qaysi sezgür mesililerni misalgha alghanliqini ashkarilimidi.

Wang léchüenning bu sözi, u téxi yéqindila chet'ellik muxbirlargha tekitligen "sherqiy türkistan küchliri yenila Uyghur aptonom rayonining muqimliqidiki eng chong tehdit" dégen sözi bilen pütünley zit, dep qaralmaqta. Wang léchüen yighinda yene,xelq ichidiki ziddiyetke yatidighan adettiki mesililerning hemmisini hel qilish mumkin bolsimu, lékin burundin qalghan bezi qiyin mesililerde yenila charisiz qéliwatqanliqini bildürgen. U rayondiki her derijilik kadirlardin bu mesililerge hel qilish charisi tépishni telep qilghan.

Xelq'ara kishilik hoquq teshkilatliri bolsa , xitay da'irilirining "sherqiy türkistan küchlirining tehditi" déginini amérikining xelq'ara térrorchiliqqa qarshi urushidin paydilinip, Uyghur siyasiy öktichilirini basturushtiki bir bahanisi, dep eyiblimekte. Yéqinda amérika dölet mejlisi we hökümetning xitay ishliri komitéti élan qilghan bir doklatta, xitay da'irilirining Uyghur élide élip barghan basturush herikiti asasliqi Uyghurlarning milliy kimlikige qaritilghanliqini ilgiri sürgen. (Erkin)