11 Түмән хитай пахтикар уйғур елигә қарап йолға чиқти

  Хитай даирилири уйғур елиниң кевәзликлиригә пәсиллик ишләмчиликкә келидиған хитай аққунлириға уйғур елигә қатнайдиған пойиз төмүр йол ленийилиригә " пахта тәргүчи қошун" намида мәхсус пойиз вагонлирини аҗратқан.

Хәвәргә қариғанда хитай пәсиллик пахтикарларниң уйғур елигә еқиш юқири долқуни 25 - сентәбир әтрапида башлинидикән. Хитай даирилири уйғур елини хитайдики әң чоң пахта базисиға айландурғандин буян болупму биңтуәнниң көп қисим кевәзликлиригә һәр йили мушу пәсилдә кевәз терийдиған үчүн хитай өлкилиридин нәччә йүз миңлап пәсиллик ишчиларни йөткимәктә. Уларниң һәр бириниң уйғур елидә кевәз териштин тапидиған айлиқ кирими үч миң йүән әтрапида болмақта.

Хитай ишләпчиқириш қурулуш биңтуәниниң әмгәк мулазимәт тармақлири йеқинда бу йил биңтуәнниң 600 миң әтрапида кевәз тәргүчи ишләмчигә муһтаҗ икәнликини елан қилди. Кевәз йиғиш үчүн пәсиллик ишләмчиләрниң көп қисми йәнила хитай өлкилиридин келидиған болуп, аз бир қисмини уйғур райониниң хотән, қәшқәр, турпан, ғулҗа қатарлиқ җайлиридин қобул қилидикән.

Уйғурларниң инкасиға қариғанда хитайниң йеза ешинча әмгәк күчлирини йөткәп ишқа орунлаштуруш сиясити бойичә уйғурларни һәр йили бир милйон икки йүз миң адәм қетимдин хитай өлкилиригә ишләмчиликкә йөткәватқан болсиму, улар уйғур елигә кевәз теришқа кәлгән хитай аққунлиридәк кирим қилалмайдикән. Һәтта, бәзилириниң айлиқ кирими бәш йүз йүәнгиму йәтмәйдикән.