11 Tümen xitay paxtikar Uyghur élige qarap yolgha chiqti

  Xitay da'iriliri Uyghur élining kéwezliklirige pesillik ishlemchilikke kélidighan xitay aqqunlirigha Uyghur élige qatnaydighan poyiz tömür yol léniyilirige " paxta tergüchi qoshun" namida mexsus poyiz wagonlirini ajratqan.

Xewerge qarighanda xitay pesillik paxtikarlarning Uyghur élige éqish yuqiri dolquni 25 - séntebir etrapida bashlinidiken. Xitay da'iriliri Uyghur élini xitaydiki eng chong paxta bazisigha aylandurghandin buyan bolupmu bingtu'enning köp qisim kéwezliklirige her yili mushu pesilde kéwez tériydighan üchün xitay ölkiliridin nechche yüz minglap pesillik ishchilarni yötkimekte. Ularning her birining Uyghur élide kéwez térishtin tapidighan ayliq kirimi üch ming yüen etrapida bolmaqta.

Xitay ishlepchiqirish qurulush bingtu'enining emgek mulazimet tarmaqliri yéqinda bu yil bingtu'enning 600 ming etrapida kéwez tergüchi ishlemchige muhtaj ikenlikini élan qildi. Kéwez yighish üchün pesillik ishlemchilerning köp qismi yenila xitay ölkiliridin kélidighan bolup, az bir qismini Uyghur rayonining xoten, qeshqer, turpan, ghulja qatarliq jayliridin qobul qilidiken.

Uyghurlarning inkasigha qarighanda xitayning yéza éshincha emgek küchlirini yötkep ishqa orunlashturush siyasiti boyiche Uyghurlarni her yili bir milyon ikki yüz ming adem qétimdin xitay ölkilirige ishlemchilikke yötkewatqan bolsimu, ular Uyghur élige kéwez térishqa kelgen xitay aqqunliridek kirim qilalmaydiken. Hetta, bezilirining ayliq kirimi besh yüz yüen'gimu yetmeydiken.