Xitay hökümiti türmidin boshitilghan Uyghurlarni yene nazaret astigha almaqchi

Dilshat rishitning körsitishiche, ili oblastliq edliye mehkimisi bu yil 5 - ayda ichki höjjet chüshürüp, 1990 - ilidin 2007 - yilighiche bolghan ariliqta emgek bilen terbiyilesh orunliridin qoyup bérilgen mehbuslarning néme oy bilen yürüwatqanliqini bilish meqsitide tizimlash xizmitini bashlighan.

Dilshat rishit teminligen matériyalda ashkarilinishiche, Uyghur aptonom rayoni partkomi tarqatqan "2008 - yilliq olimpik muqimliqini qoghdash xizmet pilani" ning rohigha asasen, ili oblastliq edliye mehkimisi, oblast tewesidiki barliq sheher we nahiyilerde 35 künlük, 1990 - yilidin 2007 - yilighiche ariliqta türmidin qoyup bérilgen mehbuslarning ehwalini igilesh we tizimlash xizmitini bashlatqan.

Ichki höjjetning üchinchi tarmiqida mundaq körsitilgen: " dölet bixeterlikige ziyan yetküzgen hemde qanunsiz diniy pa'aliyet bilen shughullan'ghan, bolupmu milliy bölgünchilerning gholluq unsurliri, térrorchi, zorawan jinayetchiler we diniy esebiy küchlerning rehberlirining, xeterlik mehbus, üch xil unsur jinayiti bar kishilerning ehwalini asasliq tekshürüp éniqlash, shuning bilen birlikte, yuqirida sanalghan unsurlargha ayrim tizimlash xatirisi tutup, yuqirining bashqurushigha alahide tapshurush."

Mezkur ichki matériyal heqqide toxtalghan dilshat rishit, bu xildiki höjjet aptonom rayon buyiche ortaq chüshürülgen bolup, her qaysi yerlik hökümet apparatliri oz ehwaligha qarap her xil shekilde yürgüzüshke bashlighan.

Dilshat rishit, "eslidinla xitay hökümitining ziyankeshlikige uchrighan bu atalmish mehbuslar olimpik munasiwiti bilen erkinlikidin yene bir qétim mehrum qaldurulmasliqi kérek" dédi we xelq'ara jem'iyetni Uyghur ilidiki kishilik hoquq depsendichilikige jiddiy étibar bérishke chaqirdi.