Uyghur aptonom rayonida öz ‏- ara qoshuwitilgen milliy we xitay mekteplirining sani 700 ashti

Junggo da'iriliri Uyghur aptonom rayonida buningdin kéyin milliy oqughuchilar bilen xitay oqughuchilarning 1 - siniptin bashlap ariliship oquydighanliqini bildürdi. Lékin ularning eskertishiche, bu nishan'gha yétish üchün waqit kétidiken. Nöwette Uyghur aptonom rayoni boyiche öz ara qoshuwitilgen milliy we xitay mekteplirining sani 2006 - yilghiche 707 ge yétip barghan.

Uyghur aptonom rayoni ma'arip nazaritining emeldari péng shyenwéyning shinxu'a axbarat agéntliqigha eskertishiche, bu " milliy ma'aripning sapasini östürüp, qosh tilliq oqutushni ilgiri sürüshke muhit yaratmaqta". U, ma'arip da'irilirining buningdin kéyin xitay we milliy oqughuchilardin terkip tapidighan " arilashma siniplar"ni köpeytidighanliqini bildürdi. Lékin buning waqit alidighanliqini tekitligen péng shyenwéy, "bashlan'ghuch we yesli ma'aripini yaxshi élip barghanda ösmürlerning anglash iqtidarini hel qilghan bolimiz. Shundaqta biz arilashma siniplarni birinchi yilliqidin bashlap yolgha qoyalaymiz" deydu.

Uyghur aptonom rayoni partikomining sékritari wang léchüen, Uyghurlargha xitay tilida ders ötüshni 100 yilliq istratégiyilik pilan, dep teripligen. Lékin bu siyasetni tenqid qilghuchilar, bu pilan Uyghur tili we Uyghur medeniyitini yoqitish, Uyghurlarni assimilyatsiye qilishni meqsed qilghan, dep eyiblimekte. (Erkin)