Xitay ölkiliride ishqa orunlashturulghan Uyghur qizliri kishilerni qattiq endishige salmaqta

Uyghur élidiki yash qiz - chokanlarni xitay ölkisidiki zawut ‏- karxanilargha ishqa orunlashturush mesilisi, nöwette yalghuz chet'ellerdiki Uyghurlarning arisida ghul - ghula qozghapla qalmastin belki weten ichidiki Uyghurlarningmu diqqitini tartmaqta.

Uyghur élidiki tor betliride, bu heqtiki inkaslar élan qilin'ghan bolup, uning biride xitay ölkisidiki bir zawutta yüz bergen weqe bayan qilin'ghan. Weqede zawut ashxanisida xitay ashpezning Uyghur qizliri üchün tamaq étidighanliqi, gerche ishchi qizlargha bérilidighan mu'ash bir ayda 530 yü'en dep békitilgen bolsimu, amma ma'ashning waqtida tarqitilmay nésige qaldurulghanliqi, eger xitay shehiride xizmet qilishqa qoshulmisa kelgüside toy xéti bermeslik, hashargha emgekke sélish, qanunluq yerlerni tartiwélish shert qilin'ghanliqi ashkarilan'ghandin sirt, hetta qizlarning ata ‏- aniliri bilen téléfunda sözlishishimu cheklen'gen hemde sirttin téléfun kirse awaz chiqmaydighan qilip qoyghan, qizlar buninggha oxshash xorluqlardin qattiq azablan'ghan.

Bu ehwallardin xewer tapqan kishiler, Uyghur qizliridin qattiq endishe qilish bilen birlikte, ehwalni aptonom rayon hökümitige melum qilip, qizlarning xizmet ishlesh waqti, turmushi qatarliqlar üstide sürüshtürüsh élp bérish heqqide jama'et pikiri toplashni oylashqan.

Chet'ellerdiki Uyghur teshkilatliri bolsa, xitay hökümitining qizlarni xitay ölkilirige orunlashturushtiki meqsidi, Uyghurlarni assmiliyatsiye qilish we xitayda yüz bériwatqan er ‏- ayal nisbitining tengpungsizliqini tengshesh siyasitini ishqa ashurush bolushi mumkin dep qiyas qilishmaqta. (Eqide)