B d t : qazaqistan Uyghur musapirini xitaygha mexpiy ötküzüp bergen bolushi mumkin

B d t musapirlar aliy komisariyati qazaqistan da'irilirining bu yil 10 - ayda almatada iz déreksiz yoqap ketken Uyghur siyasiy musapirni xitaygha mexpiy ötküzüp bérip, xelq'ara musapirlar ehdinamisida üstige alghan mejburiyitige xilapliq qilghan bolushi mumkin, dep gumanlinidighanliqini bildürdi.

B d t musapirlar aliy komisariyatining ottura asiyadiki wekili sizar dyubon, musapirlar aliy komisariyatining 23 - öktebir küni yoqap ketkendin béri hazirghiche iz dérikini alalmighan yarmemet yasin sabir isimlik Uyghur musapirning teqdiridin endishe qiliwatqanliqini bildürdi.

Sizar dyubonning eskertishiche, yarmemet yasin qazaqistan amanliq da'iriliri teripidin 4 ay tutup turulghan we sot mehkimisi uni 23 - öktebir küni shertlik qoyup bergendin kéyin shu küni iz déreksiz yoqap ketken. Sizar dyubon birleshme axbarat agéntliqigha " musapirlar komisariyati bu musapirning xitaygha ötküzüp bérilgenlikidin ensireydu " dédi we "eger bu rast bolsa xelq'ara musapirlar ehdinamisigha ashkara xilapliq qilghanliqtur " dep körsetti.

Yarmemet yasin sabir, bu yil 7 - ayda qazaqistan amanliq da'iriliri teripidin tutup kétilgendin kéyin, uning ayali b d t musapirlar komisariyatining almatadiki ishxanisidin siyasiy panahliq sorighan. Lékin qazaqistan da'iriliri musapirlar ishxanisining yarmemet yasin sabir bilen körüshüsh telipini ret qilghan idi. Sizar dyubon, qazaqistan qanun séstimisini " ochuq - ashkara emes " dep eyiblidi. (Erkin)