Pichan nahiyisidin 167 neper Uyghur yash ichkiri xitaygha élip kétildi
2007.02.11
Uyghur élining her qaysi namrat nahiyiliridiki yéza-qishlaqlardin Uyghur yash qizlirining ichkiri xitay ölkilirige élip bérilip, türlük xizmetlerge séliniwatqanliqining dawami supitide shenbe küni turpan wilayitidin yene 167 neper Uyghur yash ichkiri xitaygha yolgha sélin'ghan.
Shinjang xewer torining uchurida körsitilishiche, mezkur 167 neper yash turpan wilayitining pichan nahiyisidin bolup, ular ji'éjang ölkisining xeyyen nahiyisidiki bir kiyim-kéchek zawutigha ishleshke ewetilgen. Bu pichan nahiyisining birinchi aydin buyanqi ikkinchi türkümdiki ichkiri xitaygha ewetilgen emgek küchliri bolup hésablinidiken. Xewerde körsitilishiche, pichan nahiyisidiki déhqanlarning kishi béshigha kélidighan kirimi 141 yu'endin ibaret.
Buningdin ilgiri xitay axbarat wasitiliri peyziwat qatarliq nahiyilerdin mexsus Uyghur qizlirining ichkirige élip bérilip emgekke sélin'ghanliqini xewer qilghan idi. Melumatlargha qarighanda, aldinqi yili peyziwattin bir qétimda 400 qiz, arqidin yene 200 qiz ichkirige élip kétilgen. Bezi inkaslarda bu sanning téximu köp ikenliki we mejburlash xaraktérige ige bolghanliqimu bildürülgen idi.
Xewerde pichan nahiyisidin jéjang ölkisige élip kétilgen bu 167 neper yashning jinsiy terkibi éytilmighan bolup, inkaslargha qarighanda, asasliqi teqqi –turqi chirayliq bolghan Uyghur qizlirining ichkirige élip kétiliwatqanliqi bildürülmekte.
Chet'ellerdiki Uyghur pa'aliyetchiliri Uyghur élide yashap, "xitay tili bilmeydu" dégen bahane bilen ishqa orunlishalmighan Uyghur qizlirining, pütünley xitay tili ishlitilidighan ichkirige élip bérilip, ishqa orunlashtulushining mentiqisiz ikenlikini, ichkirige élip kétilgen uygur qizlirining türlük köngülsiz aqiwetlerge we xorlashlargha uchrawatqanliqini bildürüshmekte. (Ümidwar)
Munasiwetlik maqalilar
- Xitay hökümiti bu yil yene 100 ming kishini xitay ölkilirige yötkimekchi
- Yopurghidin ötken bir yilda 2450 kishi xitay ölkilirige ishqa orunlashturulghan
- Yenimu köp Uyghur déhqan qizliri yurtliridin ayrilip yallanma ishchiliqqa mangmaqta
- Xitay hökümiti Uyghur élidin 400 ming déhqan ayalni orunlashturush pilani tüzdi
- Saqchilar pichandiki adem öltürüsh weqesining jawapkarini "nérwa késili" dep élan qildi