Йәкән наһийисидин 500 нәпәр қиз хитай өлкилиригә тошуп кетилди
2007.03.30
Йәкән көзники тор бетидики хәвәрләргә қариғанда 29 - март әтигәндә 500 нәпәр қиз хитайниң чиңдавдики җавҗу шәһириниң шинюңән кийим- кечәк завутиға йолға селинған.
Хәвәрдин ашкарлинишчә, йәкән наһийисиниң әмгәк күчлирини сиритқа йөткәш намида хитайға йөткигән қизларниң нисбити алдинқи йилдикидин көрүнәрлик юқири болған. Бу йил киргәндин буян, йәкән наһийиси һәрқайси дәриҗилик идарә-органларни орунлаштуруп хитайға баридиған бу қизларға нисбәтән, хитай тили вә кәспий тәрбийә елип барған.
Бу йил иккинчи айниң бешида, йәкән әмгәк күчлирини хитайға йөткәш тармақлири җеҗяң өлкисиниң бофа гуруһи ишхана буюмлири завутиға вә чиңдавдики җавҗу шәһириниң шинюңән кийим -кечәк завутиға 500 нәпәр қизни йолға салған иди.
Оз мухбирлиримиз бу җайларға йолға селинған қизларниң ата-анилиридин игилигән мәлуматқа қариғанда чиңдавдики бу кийим-кечәк завутиға орунлаштурулған қизларниң нурғунлири қаттиқ ишқа селинған, һәтта тән җазасиға учриған икән. Мушу завуттики бир қизниң йиғлап туруп анисиға ейтишичә, у завуттики хитайлар бу қизларни дәм елишқа рухсәт қилмиған, бойсунмиғанларни урған, һәтта ата-анисиға телефун қилишқиму йол қоймиған.
Хәвәрләргә асасланғанда, бу йил йәкән наһийисидин сиртқа йөткилидиған әмгәк күчиниң сани 6 миңдин ашидикән.
Буниңдин башқа йәнә, йеңисар наһийисидинму хитайниң җеҗяң өлкисигә 185 нәпәр қиз йолға селинған болуп, буларниң кичики 16 яш, чоңи 22 яш икән. Рабийә қадир ханим өзиниң бу қетим қатнашқан бирләшкән дөләтләр тәшкилати кишилик һоқуқ кеңишиниң йиллиқ йиғинида уйғур қизларниң мәсилисини алаһидә оттуриға қойған вә дуня җамаәтчиликиниң диққитини қозғиған иди. (Җүмә)
Мунасивәтлик мақалилар
- Уйғур елидин йәнә бир түркүм қизлар хитай өлкилиригә тошуп кетилди
- Қәшқәрдин 240 миң аял сиртқа йөткәп китилгән
- Йәнә бир түркүм уйғур яшлири хитай өлкилиридики завутларда ишчи болушқа йолға селинди
- Пичан наһийисидин 167 нәпәр уйғур яш ичкири хитайға елип кетилди
- Хитай һөкүмити бу йил йәнә 100 миң кишини хитай өлкилиригә йөткимәкчи