Ваң лечуән қош тиллиқ маарипни чиң тутушни қайта тәкитлиди


2004.11.03

Хитай компартийиси мәркизи сиясий бийоро әзаси, уйғур аптоном райониниң партком секритари ваң лечуән уйғур елидики барлиқ маарип идариси секритарлири вә башлиқлириға елип берилған өгиниш курсида сөз қилип, уйғур елиниң муқимлиқи вә тәрәққиятиниң маарипқа тайинидиғанлиқи, маарипниң асасий вә муһим нуқтиси болса, пүтүн күч билән аз санлиқ милләт қош тиллиқ ихтисас игилирини яритиш икәнликини тәкитлиди.

" Шинҗаң иқтисад гезити" бәргән хәвәрдә көрситилишичә, бу йиғинға йәнә, уйғур аптоном райони парткоминиң муавин секритари, аптоном район рәиси исмайил тиливалди вә муавин партком секритари нур бәкри қатнашқан.

Ваң лечуән йиғинда, нөвәттә уйғур елидики әң муһим вәзипиниң, аз санлиқ милләтләрдин қош тилда йетишкән ихтисас игилирини йетилдүрүш икәнликини, шуңа уйғур елиниң һәр қайси җайлиридики маарип орунлириниң аз санлиқ милләт районлирида аммини хитайчә үгинишкә риғбәтләндүрүп, аз санлиқ милләт оқуғучилири арисида хитайчә оқутушни омумлаштурушқа пүтүн күчи билән тиришиши керәкликини оттуриға қойған.

Хәвәрдә көрситилишичә, йиғинда исмайил тиливалди маарип сестимисидики барлиқ кадирларға бир йүрүш тәләп вә тәклипләрни оттуриға қойған, әмма хәвәрдә униң тәпсилати берилмигән.(Пәридә)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.