Wang léchüen xitay oqughuchilirini Uyghur diyarigha kélishke chaqirdi

Xitay hökümitining awazi hésablinidighan shinjang xelq radi'o istansisining uchurigha qarighanda, Uyghur aptonom rayoni kompartiye sékritari wang léchüen ürümchide ötküzülgen aptonom rayonluq gherbke yardem bergüchi aliy mektep oqughuchiliri programmisining mukapatlash yighinigha qatniship, ichkiridiki xitay oqughuchilirini shinjanggha köplep kélishke chaqirip, ularning bu jayda istiqbalining zorluqini körsetken.

Xewerdin ashkarilinishiche, aliy mektep oqughuchilirining gherbke yardem bérish programmisi 2003-yili aptonom rayon teripidin yolgha qoyulghandin buyan, 1379 oqughuchi bu plan boyiche Uyghur aptonom rayonigha kelgen. Bu yil xitay ittipaq komitéti yene 818 ademni yardem bérishke ewetken iken.

Mezkur mukapatlash yighinida söz qilghan wang léchüen eger yardem bergüchi aliy mektep oqughuchiliridin kim ikki yil ichide az sanliq millet tilini öginip, adettiki turmush tilini igilise uni aptonom rayonning resmi hökümet xizmetchisi süpitide ishqa qobul qilidighanliqini bildürgen.

Uningdin ilgiri wang léchüenning yurti shendong ölkisidin 300 din artuq xitay oqughuchisining Uyghur diyarigha kelgenliki xewer qilin'ghan idi. Biraq, Uyghurlarning qarishiche, xitay hökümiti ichkiridiki xitay oqughuchilirini Uyghur diyarigha kélishke chaqiriwatqanda, her yili köpligen Uyghur aliy mektep oqughuchiliri oqush püttürüp ishqa orunlishalmaydu, Uyghur aliy mektep oqughuchiliri arisidiki ishsizliq künsayin köpeymekte. (Ümidwar)