Nur bekri "ma'aripni xitaychilashturushni axirghiche dawamlashturimiz", dédi


2006.12.17

Xitay hökümitining orunlashturishi bilen Uyghur éli miqyasida üch ay jiddi dawamlashqan az sanliq millet balilirining "jungxu'ani söyimen" témisidiki xitayche sözlesh musabiqisi axirliship 15 - dékabir jüme küni, ürümchide tallan'ghan xitay tili boghunlirini mukapatlash yighini ötküzülgen.

Yighin'gha qatnashqan Uyghur aptonum rayoni partkomining mu'awin sékrétari nurbekri az sanliq millet balilirigha xitayche ma'aripni kücheytish, xelqni bay qilish, xelqni muqimliqqa ige qilishning asasi dep sözlep "biz ma'aripni xitaychilashturush siyasitini boshashmay axirghiche élip barimiz", bolupmu balilardin bashlap élip bérish kérek " dep tekitligen. Shundaqla bu xildiki balilarni xitaychini yaxshi öginishke, xitaychini yaxshi sözleshke righbetlendüridighan musabiqe pa'aliyetlerning qosh tilliq ma'aripni ilgiri sürüshte ehmiyiti zor dep körsetken.

Xitay hökümiti hemde ma'arip tarmaqlirining orunlashturushi bilen élip bérilghan Uyghur élidiki xitay tilida sözleydighan boghunlarni tallash musabiqisigha besh yashtin 15 yashqiche bolghan az sanliq millet baliliri hem ösmürliri qatnashturulghan.

Gerche xitay hökümiti Uyghur élide yürgüzüwatqan ma'arip siyasitini, qosh tilliq ma'arip dep atawatqan bolsimu, emeliyette bu xil ma'arip siyasiti peqet az sanliq millet balilirighila qaritilghan bolghachqa Uyghurlar buning milliy ma'aripni xitaychilashturush siyasiti ikenlikidin narazi bolup kelmekte. Emma xitay hökümiti qosh tilliq ma'aripining yürgüzilishige qarshi chiqqan yaki narazi bolghan Uyghurlarni basturmaqta.

Yéqinda Uyghur élidiki eng nuqtiliq ottura mektep bolghan ürümchi tejribe ottura mektepning ikki neper Uyghur oqutquchisini mushu bahane bilen xizmettin qaldurghan. (Gülchéhre)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.