Уйғур илидики идарә, җәмийәтләргә хизмәтчи алғанда динға ишәнмәйдиғанларни таллаш тәләп қилинған
2007.12.26
Уйғур аптоном райони даирилириниң һәр қайси вилайәтләрдики мунасивәтлик органларға чүшүргән бир һөҗҗитидә, йәрлик даириләрдин идарә - җәмийәтләргә техник яки хизмәтчи хадимларни қобул қилғанда динға ишәнмәйдиған, диний паалийәтләргә қатнашмайдиған кишиләрни таллашни тәләп қилған.
2007 - 7 Номур, дәп бәлгә қоюлған "идарә - җәмийәтләргә хизмәтчи вә техник хадимларни қобул қилиш һәққидики бәлгилимә" ни уйғур аптоном райони парткоминиң тәшкилат бөлүми, кадирлар назарити, әмгәк вә иҗтимаий параванлиқлар назарити һәмдә малийә назарити қатарлиқ органлар түзгән болуп, һөҗҗәттә хизмәткә қобул қилинғучиниң хитай тилини яхши билиши тәләп қилинипла қалмай, униң миллий бөлгүнчилик вә қанунсиз диний паалийәтләргә тәврәнмәй қарши туридиған кишиләрдин болушини, җүмлидин динға ишәнмәйдиған шундақла диний паалийәтләргә қатнашмайдиған кишиләрдин болушқа капаләтлик қилишини тәкитлигән.
Лекин һөҗҗәттә диний паалийәтләр қайси диний һәрикәтләрни өз ичигә алидиғанлиқини чүшәндүрмигән болуп, роза һейт вә қурбан һейт намизи шундақла җиназә намизиға қатнашқан бир кишиниң диний паалийәткә қатнашти, дәп қарилидиған яки қаралмайдиғанлиқини тилға алмиған.
Хитай асасий қануни пуқраларниң диний етиқад әркинликини етирап қилсиму, лекин кишилик һоқуқ тәшкилатлири хитай пуқралириниң диний ибадәт әркинлики боғулуватқанлиқини тәнқид қилмақта.
Дуня уйғур қурултийиниң баянатчиси дилшат ришит радиомизға бәргән баянатида , бу бәлгилимә хитай асасий қануни вә хәлқара әһдинамиларға ашкара хилап болупла қалмай, бу йәнә "уйғурларниң хизмәткә орунлишишини тосайдиған кишилик һоқуқ зиянкәшликидур"дәп әйиблиди. (Әркин)
Мунасивәтлик мақалилар
- Кишилик һоқуқ тәшкилати: хитай мәктәплиридә өсмүрләрни әмгәккә елиш ишлири мәвҗут
- Бу йил хитайниң дөләт бихәтәрликигә четишлиқ җинайәтчиләрни әң көп қолға алған йили
- Уйғур районида икки америка ширкити үстидин тақаш буйруқи чиқирилди
- Уйғур елидә бир йәр асти черкавиға сақчилар бесип кирди
- Хитай диний саһәгә қаратқан бесимини йәниму күчәйтмәктә
- Хитай һөкүмити уйғур диний затлирини компартийә сияситигә бойсундурушқа урунмақта
- Уйғур елидә йүргүзүлүватқан "2007 - йиллиқ баһар шамили" уйғурларниң қаттиқ наразилиқини қозғиди
- Қәшқәр һөкүмәт даирилири хитайға йөткигән уйғур деһқан әмгәк күчлирини кәмситти
- Хитай һөкүмити қизилсу областида бу йил йәнә 420 диний затни "вәтәнпәрвәр " қилип тәрбийилимәкчи
- Ақсуда диний затлар сиясий бесимға учримақта