Хотәндә қаш теши байрими өткүзүлди

Уйғур елиниң җәнубидики уйғурлар зич олтурақлашқан хотән шәһиридә 25-авғуст күни қаш теши байрими өткүзүлди.

Хитай һөкүмити хотәнниң хитай вә дуняға даңлиқ байлиқи қаш тешини асасий тема қилип уюштурған мәзкур мәдәнийәт саяһәт байримиға " ечиветилгән хотән гүзәл қаш теши пайтәхти дәп " нам бәргән болуп, төтинчи қетимлиқ мәзкур қаш теши байрими хотән шәһәр мәркизидики иттипақ мәйданида өткүзүлгән. Мәзкур мәйданға 50-йилларда хитай компартийисиниң даһийси мавзедоңни көрүш үчүн ишәккә минип сәпәргә атланмақчи болған, кейин мавзедуң билән көрүштүрүлгән қурбан тулумниң мав билән қол елишип көрүшиватқан һәйкили орнитилған болуп, компартийә тәшвиқат органлири тәрипидин бу һәйкәл хотән хәлқиниң арзу-арманлириниң символи сүпитидә тәшвиқ қилинған болуп, игилигән хәвәрләрдин қариғанда, уйғур артислар мәзкур һәйкәлниң йениға ясалған сәһнидә уйғурчә нахша-музикиларни орундиған, хәвәрләрдин қариғанда, паалийәткә тәхминән 10 миңдин артуқ адәм қатнашқан.

Уйғур аптоном райони даирилири он нәччә йиллардин буян аптоном район даирисидә турпан үзүм байрими, күсән сәнәт байрими, қоғун байрими дегәндәк түрлүк намлар астида һәр қайси юртларниң өз алдиға байрам паалийәтлирини уюштурушиға рухсәт қилиш арқилиқ , уйғурларниң ком партийиниң рәһбәрликидә баяшат яшаватқанлиқини тәшвиқ қилиш мәқситигә йәтмәкчи болған икән.

Хотәнниң қаш тешиға еришип, бай болушни мәқсәт қилған, ичкиридин чиқиватқан қаш теши издигүчиләрниң хотәндики юруңқаш дәрясиниң саһиллирини қезип, вәйран қиливәткәнлики, нәтиҗидә, хотәнниң екологийилик муһитиниң еғир дәриҗидә бузулуватқанлиқи мәлум. (Үмидвар)