Xotende qash téshi bayrimi ötküzüldi

Uyghur élining jenubidiki Uyghurlar zich olturaqlashqan xoten shehiride 25-awghust küni qash téshi bayrimi ötküzüldi.

Xitay hökümiti xotenning xitay we dunyagha dangliq bayliqi qash téshini asasiy téma qilip uyushturghan mezkur medeniyet sayahet bayrimigha " échiwétilgen xoten güzel qash téshi paytexti dep " nam bergen bolup, tötinchi qétimliq mezkur qash téshi bayrimi xoten sheher merkizidiki ittipaq meydanida ötküzülgen. Mezkur meydan'gha 50-yillarda xitay kompartiyisining dahiysi mawzédongni körüsh üchün ishekke minip seperge atlanmaqchi bolghan, kéyin mawzédung bilen körüshtürülgen qurban tulumning maw bilen qol éliship körüshiwatqan heykili ornitilghan bolup, kompartiye teshwiqat organliri teripidin bu heykel xoten xelqining arzu-armanlirining simwoli süpitide teshwiq qilin'ghan bolup, igiligen xewerlerdin qarighanda, Uyghur artislar mezkur heykelning yénigha yasalghan sehnide Uyghurche naxsha-muzikilarni orundighan, xewerlerdin qarighanda, pa'aliyetke texminen 10 mingdin artuq adem qatnashqan.

Uyghur aptonom rayoni da'iriliri on nechche yillardin buyan aptonom rayon da'iriside turpan üzüm bayrimi, küsen sen'et bayrimi, qoghun bayrimi dégendek türlük namlar astida her qaysi yurtlarning öz aldigha bayram pa'aliyetlirini uyushturushigha ruxset qilish arqiliq , Uyghurlarning kom partiyining rehberlikide bayashat yashawatqanliqini teshwiq qilish meqsitige yetmekchi bolghan iken.

Xotenning qash téshigha ériship, bay bolushni meqset qilghan, ichkiridin chiqiwatqan qash téshi izdigüchilerning xotendiki yurungqash deryasining sahillirini qézip, weyran qiliwetkenliki, netijide, xotenning ékologiyilik muhitining éghir derijide buzuluwatqanliqi melum. (Ümidwar)