Xotende yoqap ketken rusiyilik sayahetchilerning biri hayat qutquzuwélindi

Xitay ‏- rusiye birleshme qutquzush etriti, Uyghur aptonom rayonining xoten wilayiti yurungqash deryasining yuqiri éqimida yoqap ketken rusiyilik 6 neper sayahetchini izdesh herikiti bashlap ikki heptidin kéyin, sayahetchilerning biri jüme küni hayat tépildi. Buningdin bir qanche kün burun qutquzush xadimliri yurungqash deryasining yuqiri éqimidin 3 neper rusiyilikning jesitini tapqan. Nöwette qutquzush xadimliri qalghan 2 sayahetchining iz dérikini qilmaqta.

Qutquzush tik uchar ayrupilani jüme küni chüshtin burun, 3 - jeset tépilghan yerdin bir kilométir yiraqliqta bir ademning piyade kétiwatqanliqini bayqighandin kéyin, tik uchar ayrupilan shu jaygha qonup, yoluchining yoqap ketken 6 neper rusiyilik sayahetchining ichidiki aléksandir zwérif isimlik kishi ikenlikini éniqlighan. Qutquzuwélin'ghan sayahetchining qolida héchqandaq yük taqisi yoq bolup, uchisigha tenterbiye kiyimi kiyiwalghan, putidiki ayiqi pütünley yirtilip ketken bolsimu, lékin rohi haliti qutquzghuchi xadimlar perez qilghandin yaxshiraq iken.

Xitay metbu'atlirining eskertishiche, aléksandir zwiréf, shu jayning özidila xoten shehiridiki bir doxturxanigha élip bérilghan. Uyghur aptonom rayoni hökümitining mu'awin ishxana mudiri, ili isma'il, qutquzush xizmiti zwiréfning teminligen yip uchigha asasen taki qalghan 2 neper sayahetchi tépilghiche dawam qilidighanliqini bildürgen.

Esli rusiyilik sayahetchiler 9 - ayning 6- küni xotende terjimani bilen uchrashmaqchi bolghan bolsimu, lékin rusiyilikler waqtida yétip kélelmigendin kéyin, terjiman ehwalni shu jaydiki sayahet idarisigha melum qilghan. Xoten wilayetlik sayahet idarisidiki da'iriler, rusiyilik tewekkülchilerning herikiti sayahet idarisi teshkillimigen shexsi pa'aliyet, dep körsetmekte. (Erkin)