Ху җинтав икки йиғинға қатнишиватқан уйғур ели вәкиллиригә қош тиллиқ маарипни күчәйтишни тәкитлиди


2008-03-11
Share

Хитай рәиси ху җинтав бейҗиңда икки йиғинға қатнишиватқан уйғур аптоном райони вәкилләр гурупписи музакирисигә қатнашқанда, қош тиллиқ маарипни күчәйтишни алаһидә тилға алған болуп, шинхуа агентлиқиниң хәвиридә униң сөзидин нәқил елишичә, ху җинтав шинҗаңда йәниму көп қош тиллиқ ихтисас игилирини тәрбийиләшни күчәйтиш зөрүр, буниң үчүн хитай өлкилиридики шинҗаң синиплирини кеңәйтиш, қош тиллиқ маарип сүпитини юқири көтүрүш керәк " дегән.

Вәкилләр ху җинтавниң уйғур елидә қош тиллиқ маарипни күчәйтиш һәққидики сөзлиридин кейин, мәхсус музакирә оюштурған болуп, вәкилләр қош тиллиқ маарипниң әмәлийәттә хитай тилини асас қилидиған бир тиллиқ маарип болуп қалғанлиқини тилға елишқа җасарәт көрситәлмигән. Бәзи вәкилләр гәрчә пүтүн уйғур ели маарипи қош тиллаштурушқа йүзләнгән болсиму, әмма қош тил оқутқучилири кәмчил болуш шундақла қош тиллиқ оқутқучиларниң сапасиниң бир қәдәр төвән болушидәк амилларниң, қош тиллиқ маарип сүпитиниң юқири көтүрүлүшигә тосалғу болуватқанлиқини оттуриға қойған.

Мәлум болушичә, хитай даирилири йиллардин буян уйғур елидә қош тиллиқ маарипни күчәйтиштә -2004 - йилидин башлап3791 нәпәр оттура ‏башланғуч мәктәп оқутқучилирини қош тиллиқ курсларда тәрбийилигән болсиму, уйғур ели маарип саһәсидә йәнила оқутқучи йетишмәслик мәсилиниң һәл болуши йирақ икән.

Бәзи вәкилләр, аз санлиқ милләтләр көпрәк олтурақлашқан намрат районларға қош тил оқутқучиларни йәткүзүп бериш, тәрбийиләшни күчәйтиш һәмдә җапалиқ районларда хизмәт қиливатқан оқутқучиларға яхши шараит һәм имтиязларни бериш қатарлиқ тәдбирләрни қоллинишни тәләп қилған.

Уйғур елидики бәзи оқутқучиларниң билдүрүшичә, хитай даирилири пешқәдәм тәҗрибилик оқутқучиларни қош тилда дәрс өтәлмәйду дегән баһанә һәм түрлүк емтиһан өткәлләр билән шаллаватқан болуп, йеқинқи бир қанчә йилда шу сәвәблик мәктәпләрдә оқутқучи кәмчил болуш мәсилиси еғир болмақта икән. Әксичә"уйғур ели қош тил маарипиға ярдәм бәргүчи пидакарлар"дегән нам билән,хизмәт күтүп турған хитайларни хитай өлкилиридин уйғур елидики мәктәпләргә оқутқучилиққа пиланлиқ йөткимәктә икән. (Гүлчеһрә)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт