Уйғур елидә йәнә үч нәпәр хитай бихәтәрлик хадими өлтүрүлди

Хитай ахбарат вастилириниң хәвәр қилишичә, сәйшәнбә күни намәлум кишиләр тәрипидин қәшқәрниң йеңи шәһәр наһийисиниң яманяр йезисида йол үстидики бир тәкшүрүш понкитиға қарши елип берилған һуҗумда үч нәпәр хитай бихәтәрлик хадими өлтүрүлгән вә бир нәпәр бихәтәрлик хадими еғир яриланған.
Мухбиримиз өмәр қанат хәвири
2008-08-12
Share

 Шинхуа агентлиқиниң билдүрүшичә, йолдин өтүватқан бир аптомобилдин бир яки бир нәччә кишиләр сәкрәп чүшүп, йол үстидики тәкшүрүш понкитидики бихәтәрлик хадимлириға пичақ билән һуҗум қилған. Бу һуҗумниң кимләр тәрипидин елип берилғанлиқи техи ениқ мәлум әмәс. Лекин ройтерис агентлиқиниң хәвәр қилишичә, яманяр сақчи идарисиниң бир хадими, "сәйшәнбә күнидики һуҗум террорчилар тәрипидин елип берилған," дәп көрсәткән.

Бу өткән сәккиз күн ичидә уйғур елидә хитай бихәтәрлик қисимлириға қарши елип берилған үчинчи һуҗум һесаблиниду. 4 ‏ - Авғуст күни икки уйғур яш қәшқәрдики хитай чегра қоғдаш қисимлириниң бир әтритигә һуҗум қилип, 16 хитай сақчисини өлтүргән вә 16 сини яриландурған иди. 9‏ - Авғуст күни болса, 15 нәпәр уйғур куча наһийилик сақчи идариси, һөкүмәт биналири вә бир паһишихана қатарлиқ 17 җайни бомбилиған.

Хитай ахбарат вастилириниң хәвәр қилишичә, һуҗум қилғучиларниң сәккиз нәпири сақчилар билән тоқунушта өлгән, икки нәпири болса, сақчиларниң қолиға чүшүп қалмаслиқ үчүн өзини партлитип өлгән, тоқунушлар җәрянида еғир яриланған бири 15 яштики кичик қиз болуп икки һуҗум қилғучи сақчиларниң қолиға чүшкән . Һуҗум қилғучиларниң үчи қечип кәткән.

Уйғур елидә хитай һөкүмити тәрипидин елинған қаттиқ бихәтәрлик тәдбирлиригә қаримай, елип бериливатқан бу һуҗумлар хәлқара җамаәт шуниңдәк мутәхәссисләрниң диққитини тартмақта.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт