Uyghur élide yene üch neper xitay bixeterlik xadimi öltürüldi

Xitay axbarat wastilirining xewer qilishiche, seyshenbe küni namelum kishiler teripidin qeshqerning yéngi sheher nahiyisining yamanyar yézisida yol üstidiki bir tekshürüsh ponkitigha qarshi élip bérilghan hujumda üch neper xitay bixeterlik xadimi öltürülgen we bir neper bixeterlik xadimi éghir yarilan'ghan.
Muxbirimiz ömer qanat xewiri
2008-08-12
Élxet
Pikir
Share
Print

 Shinxu'a agéntliqining bildürüshiche, yoldin ötüwatqan bir aptomobildin bir yaki bir nechche kishiler sekrep chüshüp, yol üstidiki tekshürüsh ponkitidiki bixeterlik xadimlirigha pichaq bilen hujum qilghan. Bu hujumning kimler teripidin élip bérilghanliqi téxi éniq melum emes. Lékin roytéris agéntliqining xewer qilishiche, yamanyar saqchi idarisining bir xadimi, "seyshenbe künidiki hujum térrorchilar teripidin élip bérilghan," dep körsetken.

Bu ötken sekkiz kün ichide Uyghur élide xitay bixeterlik qisimlirigha qarshi élip bérilghan üchinchi hujum hésablinidu. 4 ‏ - Awghust küni ikki Uyghur yash qeshqerdiki xitay chégra qoghdash qisimlirining bir etritige hujum qilip, 16 xitay saqchisini öltürgen we 16 sini yarilandurghan idi. 9‏ - Awghust küni bolsa, 15 neper Uyghur kucha nahiyilik saqchi idarisi, hökümet binaliri we bir pahishixana qatarliq 17 jayni bombilighan.

Xitay axbarat wastilirining xewer qilishiche, hujum qilghuchilarning sekkiz nepiri saqchilar bilen toqunushta ölgen, ikki nepiri bolsa, saqchilarning qoligha chüshüp qalmasliq üchün özini partlitip ölgen, toqunushlar jeryanida éghir yarilan'ghan biri 15 yashtiki kichik qiz bolup ikki hujum qilghuchi saqchilarning qoligha chüshken . Hujum qilghuchilarning üchi qéchip ketken.

Uyghur élide xitay hökümiti teripidin élin'ghan qattiq bixeterlik tedbirlirige qarimay, élip bériliwatqan bu hujumlar xelq'ara jama'et shuningdek mutexessislerning diqqitini tartmaqta.

Toluq bet