Нурмуһәммәд ясинниң "ява кәптәр" и ингилизчә вә хитайчиларға тәрҗимә қилинди

"ява кәптәр" намлиқ һекайиси үчүн хитай һөкүмити тәрипидин 10 йиллиқ қамақ җазасиға һөкүм қилинған маралбешилиқ язғучи нурмуһәммәд ясинниң мәзкур әсири, әркин асия радиоси тәрипидин ингилизчә вә хитайчиларға тәрҗимә қилинип нәшр қилинди. "ява кәптәр" ниң ингилизчә, хитайчә вә уйғур тилидики түпләнгән нусхиси пат йеқинда бир китаб болуп чиқиду.

Нурмуһәммәд ясинниң мәзкур әсири, бир ява кәптәрниң трагедийилик кәчүрмишини тема қилған. Әсәрдики ява кәптәр анисиниң инсанлардин һәзәр әйләш һәққидики нәсиһитигә қулақ салмай адәмләрниң қолиға чүшүп қалиду. Һикайидики ява кәптәрниң аниси, " адәмләр күнсери бизниң яшаш муһитимизға қистап кирмәктә. Улар бизниң әзәлдин яшап кәлгән земинимиздин бизни қоғлап чиқармақчи. Йәрлиримизни тартивалмақчи," дәп тәрбийә бәргән.

Әсәрниң ахирида ява кәптәр аниси бәргән зәһәрлик бөлҗүргәнни йәп өзини өлтүрүвалиду. ява кәптәр җан үзүш алдида, "зәһәрлик бөлҗүргән вуҗудумда бир әркинликниң җарчиси болуп орунлашти. Әң ахири әркин өлүш пурситигә игә болдум," дәп хитап қилған.

"ява кәптәр" ингилизчиға тәрҗимә қилинғандин кейин, хәлқара мәтбуатларниң диққитини қозғиди. Франсийә ахбарат агентлиқи, ройтерс, бирләшмә азхбарат агентлиқи қатарлиқ мәтбуатлар "ява кәптәр" тоғрисида хәвәр бәргән.

Нурмуһәммәд ясин, һазир үрүмчидики аптоном районлуқ 1 - түрмидә җаза муддитини өтимәктә. У, өткән йили 11 - айда қолға елинип, марабеши наһийилик сот мәһкимиси тәрипидин 10 йиллиқ қамақ җазасиға һөкүм қилинған. (Әркин)